Уһулуччулаах судаарыстыбаннай уонна политическэй диэйэтэл И.Н. Барахов олоҕун кылгас суруйуутугар Тимофей Павлович Алфер туһунан бу курдук суруллубут: «…1914 с. ахсынньыга училищены бүтэрэн баран, сайын атыыһыкка үлэлээбитим, күһүнүгэр Үөһээ Бүлүү быраабатыгар дьыаланы устааччынан (переписчигынан) үлэҕэ киирбитим. Алфер диэн политсыылынай сүбэтинэн земскэй сэтээтэл Г.Ф. Корякиҥҥа суруксутунан киирбитим».
Араас источниктарга кини араспаанньатын Алфер, Асферт, Асфер дииллэр. Тимофей Павлович Арассыыйаҕа революционнай хамсааһын кыттыылааҕа эбит. Өр сылларга хаатыргаҕа хаайыллан баран, 1913 с. олунньутугар босхоломмут, ол гынан баран сайын Саха уобалаһын Бүлүү уокуругар Ньурба улууһугар поселение ыытыллыбыт.
Алфер Бүлүүнэн, Үөһээ Бүлүүнэн, Ньурбанан сылдьар кэмигэр чугастык Георгий Николаевич Чиряев диэн Хоро нэһилиэгин олохтооҕун кытта билсиспит. Суруйалларынан, Тимофей Павлович Үөһээ Бүлүү улууһун кулубатыгар Г.Е. Потаповка түһүүлэнэр эбит. Онон, бука, онно көрсүстэхтэрэ. Кэлин сыылкатын кэмэ бүтэн Алфер Бодойбоҕо барар.
Георгий Николаевич Чиряев Хороҕо Тыымпыга олохсуйбут, сэттэ хостоох аныгылыы дьиэ туттубут. Куорамыкы народнай оскуолатын бүтэрбит буолан, улууһугар суруксуттаабыт, нэһилиэгэр кинээстээбит. Монастырев В.Г. үөрэммит. Үөһээ Бүлүү Хоротугар бастакы оскуоланы 1919 с. алтынньы ыйга бэйэтин олорор дьиэтигэр астарбыт. Бодойботтон Алфер Тимофей Павловиһы аҕалан, икки сыл хамнастаан, оҕолору үөрэттэрбит. Бэйэтэ эмиэ учууталлаабыт.
Тимофей Павлович Алфер 30-с сылларга Нальчик куоракка олохсуйар. «Орджоникидзе золото» диэн көмүс атыылаһар тэрилтэҕэ сэбиэдиссэйинэн үлэлии олордоҕуна, 1937 сыл балаҕан ыйын 5 күнүгэр тутуллар. Балаҕан ыйын 17 күнүгэр «Тройка» уурааҕынан ытыллар. 1961 сыл олунньу 22 күнүгэр аата ырааһырар.
Дьэ ити курдук, И. Барахов сэтээтэлгэ суруксутунан үлэлииргэ сүбэлээбит киһитэ Алфер (Асферт, Асфер) Тимофей Павлович Хоро оскуолатыгар бастакы учуутала. Бэрт уустук дьылҕалаах киһи дьиэ кэргэнин туһунан туох да суруйууну булбатым. Кэлин көстүө диэн эрэниэххэ.
Евдокия Семенова, Исидор Барахов аатынан түмэл үлэһитэ, Үөһээ Бүлүү.
keskil14.ru