Батсаап ситимигэр оҕолор, төрөппүттэр статустарыгар киһи болҕомтотун тардар «Дьыл кэмнэрин бэлэхтэрэ» остуоруйа афишата тарҕана турар. Мин интириэһиргээммин, олорор түөлбэм «Чороон» сынньанар киинигэр бараммын, Горьяна Максимовнаттан сиһилии ол туһунан ыйыталастым.
— Горьяна Максимовна, эн «Айар аартык» театральнай студия салайааччыта буолаҕын. Театральнай студия хаһыс сылын үлэлиирий?
— Театральнай студия иккис сылын саҥардыы үлэлээн эрэр, биир сылын бүтүннүү былырыыҥҥы үөрэх дьылыгар үлэлээбитэ, быйылгы үөрэх дьылыгар бу күһүнтэн иккис сыла.
— Манна хаһыс кылаас оҕолоро дьарыктаналларый?
— Алын сүһүөх кылаас оҕолоро дьарыктаналлар этэ, ол эрээри быйыл үһүс кылаастан бэһис кылаастар сылдьаллар. Үһүстэн аҕыйах оҕо баар уонна төрдүс, бэһис кылаастар.
— Былырыын туох ситиһиилээх этигитий?
— Былырыын биһиги аҕыйахтык дьарыктанан бараммыт, күһүнтэн саҕалаан олунньуга Нарыйаана Судинова дипломнай үлэтигэр «Мин өлүөхпүн баҕарбаппын» диэн спектакль туруорбуппут. Ити үлэбитинэн биһиги араас куонкурустарга кыттыбыппыт. Биир улахан күрэхпит өрөспүүбүлүкэтээҕи Мэҥэ Хаҥалас Майатыгар «Туос мааска» диэн театральнай куонкуруска кыттыбыппыт буолар. Онно оҕолорбутун илдьэ баран, 1 степеннээх лауреат буолбуппут уонна Злата Изюмская «Лучшая женская роль» ылбыта. Толя Сивцев «Лучшая мужская роль» буолбута, маны таһынан «Лучший театральный коллектив» номинация ылбыппыт. Намҥа улуустааҕы «Смотр театров» кыттыбыппыт, онно Гран-при ылбыппыт уонна Злата Изюмская иккистээн «Лучшая женская роль» ааты ылары ситиспитэ. Мин бэйэм «Лучший руководитель» диэн номинацияны ылбытым. Биирдиилээн ыллахха, оҕолор хоһооҥҥо ситиһиини ылаллар. Бу күһүн үһүс кылаас кыргыттара Амелия Иванова-Макарова, Тускулаана Матвеева уонна Намина Стрекаловская «Я-Профи» улахан өрөспүүбүлүкэтээҕи «Краткометражка» диэн категориялаах чемпионакка 3 степеннээх дипломант буолбуттара.
— «Дьыл кэмнэрин бэлэхтэрэ» остуоруйаны көрөөччүлэргэ кылгастык билиһиннэриэҥ дуу?
— «Дьыл кэмнэрин бэлэхтэрэ» диэн кэпсээн. Ол кэпсээнтэн олоҕуран оҥоһуллубут сценарий. Бу күһүн толкуйдаабытым сценарийын. Бэйэтэ жанра «театрализованнай көстүү» диэн буолар. Манна «Айар аартык» студия оҕолоро бары кытталлар, бары оруоллаахтар. Кэлэн көрөөрүҥ, манна кыттыыны ылыахтара бэйэбит Хатыҥ-Арыы орто оскуолатын оҕолоро: үһүс, төрдүс, бэһис кылаастар. Сүрүн оруолу оонньуохтара :
Күөрэгэй – Максимова Ангелина (5 «а» кыл).
Кэскил — Евсеев Егор (5 “а” кыл).
Ийэ – Афанасьева Айгылаана (5 «б» кыл).
Аҕа – Максимов Мирослав (5 «а» кыл).
Чуор Хара – Макаров Антон (5 «а» кыл).
Күһүн – Сивцева Сайнаара (5 «а» кыл).
Кыһын – Алексеева Лейла (5 «а» кыл).
Саас – Егорова Ильяна (5 «а» кыл).
Сайын – Эверстова Элина (5 «а» кыл).
Хас биирдии оҕо бэйэтэ туспа оруоллаах, тыллаах. Онон үлэлииргэ ыарахан, ол да буоллар, мин санаабар үчүгэй остуоруйа туран эрэр.
— Махтал, Горьяна Максимовна. Буолаары турар оскуола оҕолорун «Дьыл кэмнэрин бэлэхтэрэ» остуоруйа олус интэриэһинэй эбит. Элбэх көрөөччү кэлиэ диэн эрэнэбин.
Нарыйаана Охлопкова, И.Е. Винокуров аатынан Хатыҥ-Арыы орто оскуолатын 5 кыл. үөрэнээччитэ.
keskil14.ru