Биһиги бииргэ төрөөбүт алтыабыт, биэс кыыс, биир уол. Бырааппыт күн сирин көрбүт күнүн бу баардыы көрөбүн. Аҕам түөрт кыыс кэнниттэн уолламмытын, хортуоска ыла киирбит умуһахха киирэн турдаҕына истэн, үөрүүтүттэн ойон тахсыбытын көрөн, наһаа соһуйбутум. Билигин бары үлэһит дьон, ыал ийэлэрэ, аҕата, эбээтэ буоллубут. Сорох түгэннэргэ, үлэ үгэнигэр, түбүк үксүгэр киһи оҕо буола сылдьыбытын умнан да ылар. Арай бу Оҕо көмүскэлин күнэ оҕо сааспытын санатар… Чурапчы нэһилиэгин, Милисиэ алааһын илин томторугар саҥа дьиэ тутулла турарын өйдүүбүн, дьиэ акылаатын үрдүнэн балтыларбын кытта сүүрэ сылдьарым — бу баар.
Аҕабыт, Дмитрий Дмитриевич, олус да талааннаах этэ, олус да үчүгэйдик үөрэтэр этэ. Араас музыкальнай инструмеҥҥа барытыгар оонньуура. Дьиэбитигэр гитара, баян, аккордеон баара. Онон оҕо сааспыт муусука алыптаах эйгэтигэр ааспыта. Пластинка арааһын истэрбит. Аҕабыт ордук Юрий Антонов ырыаларын сөбүлээн истэрэ, билигин да сорох ырыа матыыба, тыла өйбөр баар. Ийэбит эмиэ олус үчүгэйдик ыллыыра. Аҕабыт баяҥҥа оонньуур, ийэбит ыллыыр. Биһиги иһийэн олорон истэбит. «Мин аҕам алааһа» диэн ырыаны иккиэн бииргэ ыллааччыбыт.
Эбээ Аана, абаҕабыт Степан, ийэбит Ольга, аҕабыт Дмитрий иннилэригэр сайыҥҥы киэһэлэргэ кэнсиэр көрдөрөн ырыа-тойук, үҥкүү-битии бөҕө буоларбыт. Сорох киэһэлэргэ чугас ыалларбыт эмиэ баар буолаллара. Скакалка тутааҕын микрофон оҥостон конферансье буолан, нүөмэрдэри биллэрэн чоргуйуу! Аҕабыт баяҥҥа оонньуура, биһиги ис-испититтэн иэйэн туран ыллыыбыт, үҥкүүлүүбүт. Көрөөччүлэрбит «бис», «браво» хаһыытыыллар, ытыстарын таһыналлар… Билигин бары ырыа, үҥкүү аргыстаах дьоммут.
Аҕабыт өссө олус үчүгэйдик уруһуйдуура, биһиги сылдьар «Мичил» детсадпыт тэлгэһэтигэр баар оҕо оонньуур дьиэтигэр, сырылыыр сыырга, верандаҕа уруһуйдаабытын олус үчүгэйдик өйдүүбүн. Оонньуур дьиэ куобаҕа, эһэтэ, веранда сибэккилэрэ харахпар көстөллөр. Мин онно аҕабын батыһа сылдьарым уонна хайдах сурааһыны тардарын, киистэни хайдах тутарын барытын кэтээн көрөрүм. Онтон дьиэбэр тэтэрээккэ уруһуйдуубун, тугу эмэ сатаабатахпына аҕам көннөрөр, үөрэтэр. Ол үөрэммитим билигин олус туһалыыр, бары да уруһуйдуур буола улааттыбыт.
Ийэбит Ольга Дмитриевна — киһи мааныта этэ. Эчи холкутун, кэрэтин, өрүү мичээрдии сылдьара! Киниттэн туох эрэ сырдык сылаас уот сыдьаайарга дылы курдуга. Ийэбин санаатахпына, ис-испиттэн ыраас санаанан, сырдыгынан туолар курдукпун. Ийэбит иис бөҕөнү иистэнэрэ. Этэрбэс тигэрэ, биһиэхэ түөрт кыыһыгар таҥас бөҕө тигэрэ. Муодунай кыргыттар этибит. Балтым Саргычоктуун ийэбит таһыгар олорон, куукулаларбытыгар таҥас тигээччибит. Ийэбит хаһан даҕаны «итини тыытымаҥ, маны быһымаҥ” диэн буойа–хаайа сылдьарын, олох өйдөөбөппүн, куруутун хайгыы, сүбэлии сылдьара. Кыргыттар бары сатаан иистэнэбит.
Оҕо төрөппүтүн көрөн үөрэнэр. Биһиги бары тапталлаах ийэбит, аҕабыт туох дьарыктаахтарын, тугу оҥороллорун, сатыылларын — барытын көрө сылдьан үөрэнэн, талааннарын утумнаан улааппыппыт. Оҕо сааскар дьол кыымын туппут буоллаххына, дьоллоох киһи буола улаатаҕын — ол кырдьык.
Ааптар: Надежда Семёнова
Бүлүү, Чинэкэ.