Ыам ыйын 31 күнүттэн бэс ыйын 4 күнүгэр диэри дойдубут Бэрэсидьиэнин В.В. Путин соругунан дойдубут оҕолорун култуурунай үтүө майгы-сигили, өй-санаа өттүнэн сайдалларыгар, ону тэҥэ дойдубут уопсастыбата бөҕөргүүрүгэр уонна үп-харчы өттүнэн куттала суох буолуутун көмүскээһинигэр эйгэни тэрийэр сыаллаах «Христианское милосердие» диэн аһымал пуонда өйөбүлүнэн Финансовай университеты кытта Сретенскай духовнай академия «Наследие: ориентиры будущего» диэн улахан бырайыагы олоххо киллэрдилэр.
Саха сириттэн уопсайа 46 оҕо кыттыыны ылан кэллилэр. Ол курдук, Мэҥэ-Хаҥалас улууһуттан сахаттан бастакы Сэбиэскэй Сойуус Дьоруойа Ф.К. Попов аатынан Баатара орто оскуолатыттан, Чурапчы улууһуттан С.А. Новгородов аатынан Чурапчы орто оскуолатыттан, Д.Д. Красильников аатынан Мугудай орто оскуолатыттан, профессор Г.П. Башарин аатынан Сылаҥ орто оскуолатыттан уонна И.Е.Федосеев-Доосо аатынан Дириҥ агро хайысхалаах оскуолатыттан, Горнай улууһуттан А.Н. Осипов аатынан Бэрдьигэстээх сорох предметтэри дириҥэтэн үөрэтэр орто оскуолатыттан, В.В. Филиппов аатынан Бэрдьигэстээх оскуолатыттан, В.Д. Лонгинов аатынан Атамай орто оскуолатыттан, Дьокуускайтан Н.И. Шарин аатынанд 39, 6, 25 №дээх оскуолаларыттан, Өрөспүүбүлүкэтээҕи лицей-интернатыттан уонна Арктическай оскуолаттан оҕолор баран кэллилэр. Ону тэҥэ Өлөөн улууһуттан Х.М. Николаев аатынан Өлөөн орто оскуолатын уонна Өлүөхүмэ улууһуттан «Эврика» оройуоннааҕы гимназиятын үөрэнээччилэрэ бырыайыак кыттыылаахтара буоллулар.
Ыам ыйын 31 күнэ. Святой Троица күнэ. Бэлиэ күҥҥэ түбэһэн, Москуба куоракка көтөн тиийээт, номнуо былыргы үйэлэр Сретенийдааҕы улахан таҥара дьиэтигэр (древний собор) Владимирскай иконатын Божией Матери, ону тэҥэ Воскресения Христова, Новомучеников уонна Исповедников Церкви Русской диэн саҥа храмнарын историятын билэ-көрө, истэ кэлбиппит.
Салгыы Сретенскайдааҕы академияҕа сылдьан Духовнай оскуола үгэстэрин уонна үөрэх чааһа хайдах барарын билиспиппит. Экскурсияны монастырь студеннара уонна Академия учууталлара иеромонах Илиодор (Шевчук) уонна инок Михаил (Пелипенко) иилээн-саҕалаан ыыттылар.
Күммүт бүтүүтэ ВДНХ-ҕа Зеленай тыйаатырга Сретенскайдааҕы духовнай академия уонна монастырын хорун кэнсиэригэр сырыттыбыт. Бары билэрбит курдук христианский итэҕэлгэ церковнай песнопение сүрүн оруолу оонньуур,
Өйдөбүнньүккэ Сретенскай монастырь уонна академията хас биирдиибитигэр кыра сэмэй бэлэх уунна уонна минньигэс итии аһылыгынан күндүлээтэ.
Бэс ыйын 1 күнэ. Иккис күммүтүгэр анаммыт эти-хааны чэбдигирдэр “Лесное озеро” диэн Финансовай университет комплексыгар бэйэ-бэйэбитин кытта ыкса билистибит. Ол күн бырагырааманан толору барбыта, «Христианское милосердие» Благотворительнай пуонда толорооччу дириэктэрэ Эдуард Шабуневич оҕолору кытта көрсөн бэйэтин баҕа санааларын, оҕолорбут култуурунай үтүө майгы-сигили, өй-санаа өттүнэн сайдалларыгар, ону тэҥэ үп-харчы өттүгэр куттала суох буолуутун көмүскэнэр кыахтара күүһүрэригэр тоһоҕолоон эҕэрдэ тылларын анаата.
Бэс ыйын 2 күнэ. Үһүс күммүтүгэр ВДНХ-ҕа «Макет Москвы» павильоҥҥа дойдубут тэбэр сүрэҕин Москуба куорат кыра макетын көрдүбүт, сэҥээрдибит. Онтон күммүт иккис аҥарыгар Финансовай университеппытыгар сырыттыбыт. Онно үп-харчы түмэлигэр уонна «КиберХаб» инновационнай технологиялар киинигэр сырыттыбыт. Бу экскурсияттан сиһилии Россияҕа финансовай система историятын уонна университет аныгылыы үөрэх технологияларын билистибит.
Бэс ыйын 3 күнэ. Үһүс күммүтүгэр дойдубут кэрэ көстүүтүн, уратын айылҕалааҕын өссө төгүл бигэргэтэр виртуальнай айаҥҥа «Зарядье» парк сырыттыбыт, ону тэҥэ Москуба Кремльга экскурсиялаатыбыт.
Бэс ыйын 4 күнэ. Төрдүс түмүктүүр күммүтүгэр военно-историческай хайысханан «Патриот» диэн байыаннай-патриотическай комплекска сырыттыбыт. Партизанскай этэрээттэр хайдах олохтоох-дьаһахтаах олорон ааспыттарын билсэ Партизанскай дэриэбинэҕэ реконструкцияларынан көрдүбүт, иһиттибит. Салҕыы 1 №-дээх түмэл былаһааккатыгар байыаннай техникалары уонна РФ сэбилиниилээх күүстэрин сүрүн храмыгар уонна «Дорога памяти» түмэлигэр экскурсияҕа сырыттыбыт.
Бу курдук сүрдээх киэҥ хайысхалаах, дириҥ бырагыраамалаах бырайыакка сылдьан кэлбиппититтэн олус долгуйан, толору дьоллонон туран, Людмила Валерьевнаҕа оскуола кэлэктиибин, төрөпүттэрин уонна оҕолор ааттарыттан улахан да улахан махталбытын тиэрдэбит уонна кэлэн иһэр Үрүҥ Тунах Ыһыаҕынан алгыс тылбыт этэҥҥэ буолууну аҕаллын диэн, Ыһыах сырдык күүһэ араас кыһалҕаны ааһан, өҥ-быйаҥ сайыны, таһаарыылаах үлэни, чэгиэн-чэбдик туругу уонна бары үтүөнү аҕаллын диэн баҕара хаалабыт.
Бырайыак өссө да элбэх дойдубут оҕолорун сырдыкка, кэрэҕэ, сайдыыга түстээтин уонна үүнэ-сайда, чэчирии турдун!
Ф.К. Попов аатынан Баатара орто оскуолатыттан бырайыакка кыттыбыт оҕолор уонна салайааччылара Сайыына Свинобоева.
Кэскил14.ру