2026 сыл балаҕан ыйын 29 күнүгэр Горнай улууһун С.П. Данилов аатынан Бэрдьигэстээх орто оскуолатыгар ураты суолталаах тэрээһин буолла — түөрт өрүттээх сөбүлэҥҥэ илии баттанна уонна Виталий Антонович Вонгродскай аатынан Дьокуускайдааҕы мэдэссиинэ кэллиэһин филиала арылынна! Быйыл улууспутугар Доруобуйа сыла биллэриллэн, бу түгэн өссө бүк суолталаах буолла!
Профильнай үөрэхтээһин — биһиги кэнчээри ыччаппыт кэскиллээх инникитин мэктиэтэ. Билигин оҕолорбут ыраата барбакка, нэһилиэктэригэр олорон мэдэссиинэ суолун саҕалыыр кыахтаннылар!
Бииргэ үлэлэһии туһунан сөбүлэҥҥэ илии баттаатылар:
• «Горнай улууһа» МТ баһылыга — Никита Викторович Андреев;
• В.А. Вонгродскай аатынан ДьМК дириэктэрэ — Дмитрий Афанасьевич Алексеев;
• Горнайдааҕы киин балыыһа кылаабынай бырааһын эбээһинэһин толорооччу — Татьяна Гаврильевна Юмшанова;
• С.П. Данилов аатынан Бэрдьигээстээх орто оскуола дириэктэрэ — Павел Алексеевич Петров.
Саха Өрөспүүбүлүкэтин Үөрэҕин министиэристибэтин сөбүлэҥинэн, Бэрдьигэстээххэ кэллиэс салаата аһыллыаҕа. Манна икки идэҕэ үөрэтэллэр: «Лечебное дело» — 25 миэстэ уонна «Сестринское дело» — 25 миэстэ. Үөрэх Саха Өрөспүүбүлүкэтин судаарыстыбаннай бүддьүөтүттэн үбүлэниэҕэ.
Тэрээһини кэллиэс талааннаах устудьуоннара уонна айар кэлэктииптэрэ киэргэттилэр:
2-с куурус устудьуона, Хабаровскайга ыытыллыбыт Бүтүн Арассыыйатааҕы «Студенческая весна» күрэс лауреата — Олег Черепанов;
Кэллиэс амбассадордара — Сардаана Винокурова уонна Владимир Винокуров (имидж ролик уонна оонньуу көрдөрдүлэр);
3-с куурус устудьуона Сайаана Ноговицына уоттаах-күөстээх «Анварскай үҥкүүтэ»;
Кэллиэс «Айар-Кут» ансаамбыла «Хотугу тыын» үҥкүүтэ.
Ол эрээри тэрээһин саамай чаҕылхай түгэнинэн күн иккис аҥаара буолла. 2 чаас устата оскуола оҕолоругар кэллиэс устудьуоннара уонна уһуйааччыылара маастар-кылаастары ыыттылар. Оҕолор дьиҥнээх мэдэссиинэ үлэһиттэрин оруолугар киирэн көрдүлэр:
Стоматология: «Тииһи моделлааһын», «Тииһи туруоруу» уонна «Пломба» диэн дьыалабыай оонньуу;
Практическай сатабыл: «Систиэмэни туруоруу», «Тарбахтан хаан ылыы», «Электрокардиография»;
Педиатрия уонна неонатология: «Саҥа төрөөбүт оҕону реанимациялааһын», «Оҕо сүрэҕин тыаһын истии», «Подросток тириитин көрүү-истии эрээтэ»;
Бастакы көмө: «Механическай эчэйиигэ уонна хаан барыытыгар бастакы көмөнү оҥоруу» (интерактивнай оонньуу), «Үөһээ тыынар уорган бүөлэннэҕинэ көмөлөһүү», анал уонна туһаныллар маллары кытта билсии;
Диагностика уонна терапия: ТИР, «моой уонна сарын массааһа», «Кыһыл уотунан фототерапия» (физиотерапия аппараатын билиһиннэрии), МК-виар ачыкы уонна 3D-атлас «Киһи анатомията»;
Сэрэтии: «Электроннай сигарета буортутун туһунан» лиэксийэ.
Маастар-кылаастарга сылдьыбыт оҕолортон кылгас иһитиннэрии ыллыбыт:
Аселя Цыдендамбаева, 7 «б» кылаас үөрэнээччитэ: «Мин маастар-кылаастарга барыларыгар сырыттым. Ол эрэн ордук массааһы сөбүлээтим. Тоҕо диэтэр мин массажтыыр олоппоско модель курдук олорон, моонньубун уонна санныбын массажтаппытым, хайдах эрэ сынньанан аҕай турбутум».
Нарыйа Константинова, 7 “б” кылаас үөрэнээччитэ: «Медколледж устудьуоннарыгар уонна учууталларыгар махтал! Элбэх баҕайы саҥаны биллибит. Мин ордук косметология уонна педиатрия маастар-кылаастарын ордордум. Интэриэһинэй баҕайы эбит!»
Маны сэргэ, конференц-саалаҕа төрөппүттэргэ аналлаах мунньах буолла: «ДьМК-һи кытта билсии. Үөрэххэ туттарсыы, киирии». Төрөппүттэр үөрэххэ киирии быраабылатын, идэлэри уонна үөрэх кэскилин туһунан биллилэр.
Бу тэрээһин — Горнай улууһун үөрэҕин уонна доруобуйа харыстабылын систиэмэтигэр сүҥкэн хардыы. Саҥа салаа үрдүк таһымнаах исписэлиистэри иитэн таһааран, өрөспүүбүлүкэбит олохтоохторун доруобуйаларын харыстыахтара диэн эрэнэбит!
Виктория Колодезникова, «Сайдам» медиакиин салайааччыта, Күн Дьөһөгөй Нарыйаана, Уруйдаан Тимофеев, Арина Лаптева хаартыскаҕа түһэриилэрэ