Бу күннэргэ Чурапчы улууһугар Саха Өрөспүүбүлүкэтин үөрэххэ миниистирэ Нюргуна Афанасьевна Соколова кэлэ сырытта. Улуус киинигэр сылдьан 75 миэстэлээх «Кыталык» оҕо саадын тутуутун билистэ. Улуус баһылыга С.А. Саргыдаев эбийиэги таһынан улууска үөрэхтээһин тиһигэр тыҥаан турар боппуруостары билиһиннэрэн, үлэни-хамнаһы сырдатта.
Салгыы үөрэх миниистирэ Мындаҕаайы нэһилиэгэр ыытылла турар өрөспүүбүлүкэтээҕи «Педагог дополнительного образования: профессиональные вызовы – необходимые компетенции» эбии үөрэхтээһин педагогтарын форумугар кыттыыны ылла.
Нюргуна Афанасьевна форумҥа «Уран уустар түһүлгэлэрэ» быыстапкаларын сэҥээрэн көрдө. Үлэлэрин сырдатар педагогтары кытта кэпсэтэн үлэ-хамнас хаамыытын билистэ. Салгыы 90-с сыллартан ситиһиилээхтик үлэлиир, оҕону эт-хаан өртүнэн чэбдигирдэр «Кустук» экологическай лааҕыр базатыгар сырытта. Манна «Радость» оҕо дьоҕурун сайыннарар киин дириэктэрэ Ирина Семеновна Сергеева лааҕыр уопсай балаһыанньатын сиһилии сырдатан, инники былааннарын билиһиннэрдэ.
Бу форум биир улахан дьаһалынан дискуссия былаһааккатын үлэтэ буолла. Манна Чурапчы улууһун баһылыга С.А. Саргыдаев, Томпо, Чурапчы, Мэҥэ Хаҥалас, Ньурба, Үөһээ Бүлүү, Хаҥалас, Уус Алдан, Бүлүү улуустарыттан уонна Дьокуускай куораттан кэлбит педагогтар, Чурапчы улууһун дьаһалтата, үөрэхтээһин эйгэтин үлэһиттэрэ, форуму сүрүннүүр өрөспүүбүлүкэ тэрилтэлэрэ кыттыыны ыллылар.
Нюргуна Афанасьевна эбии үөрэхтээһин тиһигэ өрөспүүбүлүкэҕэ хайдах ыытыллан иһэрин, ханнык хайысхаҕа болҕомтону уурар наадатын бэрт судургутук, хас биирдии киһиэхэ өйдөнүмтүөтүк быһааран кэпсээтэ. Эбии үөрэхтээһин тиһигэ 6 хайысханан ыытыллар буоллаҕына, билигин чуолаан техническэй хайысханы сайыннарарга сорук турарын, оскуола ахсын бэриллэр эбии үөрэх оҕо кэлин идэ ыларыгар бастакы олугу уурарын өйдөөн туран, ол тула үлэни сайыннарарга ыҥырда. Холобурдаан эттэххэ, оскуола театра, спортивнай кулууп, музей үлэтэ курдук уруккуттан олохсуйбут үлэ хайысхаларыгар саҥа ньымалары олоххо киллэрии көдьүүстээҕин бэлиэтээтэ. Маныаха, «Юные якутяне» тэрилтэ коллектива сүрүн күүһү оҥорорун тоһоҕолоон бэлиэтээтэ. Онтон да үгүс үлэни-хамнаһы таарыйар боппуруостарга тохтоон, бэрт истиҥ кэпсэтии, көрсүһүү буолла.
Былаһааккаҕа креативнай индустрия алын академиятын салайааччыта Дария Ильинична Кириллина, Чурапчы улууһуттан үөрэх управлениетын начальнигын солбуйааччы Алена Борисовна Моисеева кыттыыны ыллылар.
Биир уопсай тылынан эттэххэ, үлэ-хамнас ситиһиилээхтик салайыллара Сахабыт Сирэ Уһук Илин регион рейтинигэр 2-с миэстэҕэ сылдьара элбэҕи этэр. Ол биир туоһутунан Мындаҕаайы күөх туонатыгар буолбут өрөспүүбүлүкэтээҕи форум үрдүк таһымҥа ыытыллыбыта буолар.
Надежда БОРИСОВА, «Радость» оҕо дьоҕурун сайыннарар киин, Чурапчы