Мэҥэ Хаҥалас улууһун Майа сэлиэнньэтигэр «Кыайыы аартыгар» олус улахан, долгутуулаах тэрээһин буолан ааста. Аҕа дойду сэриитин толоонугар дьоруойдуу охтубут биир дойдулаахтарбытын, аймахтарбытын кэриэстиир бэлиэ күҥҥэ үйэлэргэ умнуллубат уот уматылынна.
Тэрээһиҥҥэ ытык ыалдьытынан Саха Өрөспүүбүлүкэтин Ил Дархана Айсен Сергеевич Николаев кыттыыны ылла. Кини Мэҥэ Хаҥалас олохтоохторугар дириҥ ис хоһоонноох эҕэрдэ тылын тиэрдэн, Кыайыы суолтатын өссө төгүл бэлиэтээтэ. Ону кытта улуус баһылыга Дмитрий Иванович Тихонов эҕэрдэ тыл эттэ. Өссө биир ыҥырыылаах ыалдьыппыт, улууспут бочуоттаах олохтооҕо Василий Михайлович Егоров пааматынньыкка сибэкки уурда.
Майа сэлиэнньэтин уонна улуус нэһилиэктэрин олохтоохторо олус көхтөөхтүк кыттыыны ыллылар. Саҥардыллыбыт, кэҥэтиллибит «Кыайыы аартыга» аһыллыбытыттан дьон-сэргэ олус үөрдэ, дуоһуйда.
Биһиги Аҕа дойду сэриитигэр барбыт биир дойдулаахтарбытын уонна кинилэр умнуллубат ааттарын куруук өйдүү-саныы сылдьыахпыт. Кинилэр көҥүл иһин турууласпыт хорсун быһыылара, быһаарыылаах эрэллэрэ уонна Кыайыы туһугар биэрбит олохторо үйэлэргэ умнуллубат. Бүгүн биһиги кэриэстээх уот уматыыбыт — бу өйдөөһүн, махтаныы уонна ытыктабыл бэлиэтэ.
Улуу Кыайыы күнүнэн барыгытыгар чэгиэн доруобуйаны, эйэлээх халлааны, дьолу уонна соргуну баҕарабыт!
Лилиана Попова, X «Б» кылаас,
Ф.Г. Охлопков аатынан Майа орто оскуолата,
«Түмэн» медиа-киин кэрэспэдьиэнэ.
Кэскил14.ру