Историяны, урукку сыллар кэмнэрин, хойукку дьыллар хонуктарын биир сиргэ түмэн кэпсиир биир сүдү кэрэһит музей буолар. Хас биирдии нэһилиэк, оройуон түмэллэрдээх, ол түмэллэр нэһилиэк историятын, киэн туттар дьонун-сэргэтин, кэм-кэрдии хаамыытын, дойду уратыларын сиһилии арыйан көрдөрөр, билиһиннэрэр.
Ол курдук, биһиги, «Мэҥэбил» медиа киин юнкордара, ыам ыйын 20 күнүгэр Р.Г. Васильев аатынан Мэҥэ Хаҥалас улууһун кыраайы үөрэтэр түмэлигэр ыалдьыттаатыбыт. Түмэл дириэктэрэ Михаил Егорович Трифонов биһигини олус үчүгэйдик көрсөн, экскурсия ыытта. Быйыл Кыайыы 80 сылынан сибээстээн биһиги Аҕа дойду Улуу сэриитигэр анаммыт экспонаттары, сэрии кыттыылаахтарын туһунан сиһилии кэпсиирин көрдөстүбүт.
Кыраайы үөрэтэр түмэл Аҕа дойду Улуу сэриитигэр анаммыт туспа саалалаах, ол саала 5 хайысханан, ол эбэтэр сэрии хас биирдии сылларынан (1941-1945), арахсан турар. Хайысхаларынан экскурсия биир дойдулаахпыт, киэн туттар киһибит, сахалартан бастакы Сэбиэскэй Сойуус Дьоруойун аатын ылбыт Федор Кузьмич Попов бюстуттан, кини олорон ааспыт сайылыгын хаартыскаларыттан саҕаланар.


Интэриэһинэй экспонаттар — сэрии толоонуттан кэлбит снарядтар, каскалар, күрдьэ көрдөрүүгэ сыталлар. Маны таһынан, түмэл биир сүрүн киэн туттуута — «За вклад в Победу» уордьан. Бу уордьан өрөспүүбүлүкэ үрдүнэн биһиэхэ уонна Дьокуускай куоракка баарын биллибит.
Сиһилии видео-матырыйаалбытыгар көрүҥ:
Аҕа дойду Улуу сэриитин историята, эһэлэрбит, хос эһэлэрбит, биир дойдулаахтарбыт кыргыспыт ытык суоллара, Улуу Кыайыы бэлиэ күнэ үйэлэргэ сүппэтин. Ким да умнуллубат, туох да умнуллубат!
Нарыйа Солдатова, Саяра Скрябина, 10 кылаас үөрэнээччилэрэ,
В.П. Ларионов аатынан Майа орто оскуолатын “Мэҥэбил” медиа киин юнкордара, Мэҥэ Хаҥалас