Н.Е. Мординов-Амма Аччыгыйа аатынан «Кэскил» оҕо бэчээтин кыһатын иһинэн үлэлиир медиа оскуолаҕа сыл устата 500-кэ оҕо дьарыктанар. Кинилэри кытта «Кэскил» куратордара, миэстэтигэр медиа кииннэри салайар учууталлар нэдиэлэ биэс күнүн устата ыкса сибээстээхтик үлэлииллэр. Бүгүн биһиэхэ, «Кэскил» куратордарыгар эмиэ долгутуулаах күн: юнкордарбытын олох киэҥ аартыгар атаарабыт.
Эһигини кытта атаарбыт, эһигини кытта тэҥҥэ үүммүт-сайдыбыт, күлбүт-үөрбүт күннэрбитин олус күндүтүк саныыбыт. Олоххут суола киэҥ, ыраас, кэскиллээх буоллун. Ханна да тиийбиккит иһин эһиги куруук «Кэскил» юнкордара буолаҕыт!
Оскуолатааҕы сылларыгар юнкор эбээһинэһин бу күҥҥэ диэри сүгэн кэлбиттэрэ туохха туһалаабытын туһунан санааларын үллэстэллэр.
Алина Григорьева, М.Е.Васильева аатынан 2-с Малдьаҕар орто оскуолата, Хаҥалас:
– Юнкор мин сайдарбар улахан оруолу оонньоото. Юнкор буолуохпуттан элбэх доҕоттордоннум, араас улахан тэрээһиннэргэ, атын куораттарга сырыттым. Бу барыта миэхэ тугу саныырбын сааһылаан этэргэ, дьон иннигэр тахсан кыбыстыбакка саҥарар буоларга, бэйэм күүспэр, кыахпар эрэнэр буоларга үөрэттэ.
***
Нарыйана Матвеева, М.Е.Васильева аатынан 2-с Малдьаҕар орто оскуолатын медиа киинэ, Хаҥалас:
– Юнкордаабытым миэхэ суруналыыстыка эйгэтигэр дьоҕурбун сайыннарарга кыах биэрбитэ. Билигин юнкор быһыытынан ыстатыйалары суруйан, санааларбын киэҥ аудиторияҕа үллэстэр кыахтаахпын, интэриэһинэй матырыйааллары бэлэмнээһиҥнэ кыттыахпын сөп, медиа киин састаабыгар киирбиппэр олус махтанабын.
***
Дайаана Поисеева, «Мэңэбил» медиа киин, В.П. Ларионов аатынан Майа орто оскуолата, Мэҥэ Хаҥалас:
– Юнкорунан 2-3 сыл үлэлэстим, оннук үлэлии сылдьан элбэх биллиилээх дьону кытта алтыстым,тылым саппааһа эбилиннэ, камераттан кыбыстыбат буоларга үөрэнним. Юнкор мин сайдарбар элбэх инникигэ хардыыны, билиини, иэйиини биэрэн турардаах.
***
Сайыына Тобонова, «Юла» медиа киин, Маар орто оскуолата, Ньурба:
– Юнкордуурум мин сайдарбар элбэҕи биэрдэ, саамай сүрүнэ, билиим-көрүүм элбээтэ, дьону кытта алтыһарга, кэпсэтэргэ үөрэнним, куйаар ситимин сөпкө баҺылаан, араас сыһыарыылары билэн тутта үөрэнним. Бу мин инники олохпор олус туһалыа дии саныыбын. Ону таһынан, «Кэскил» миэхэ журналистика идэтэ ис иһиттэн хайдаҕын сиһилии көрдөрдө, хамаанда буолан үлэлииргэ үөрэттэ. Элбэх дьону кытта көрүстүм, билистим. Юнкордаабыппыттан олус киэн туттабын.
***
Карина Китаева, «Импульс» пресс киин, Покровскай 3 №-дээх орто оскуолата, Хаҥалас:
– Пресс кииҥҥэ 3 сыл дьарыктанным. Манна дьарыктанарым тухары дьону истэ эрэ буолбакка, тугу этэллэрин, тиэрдэ сатыылларын өйдүү үөрэнним. Хамаандаҕа үлэлииргэ, информацияны сөпкө тиэрдэргэ үөрэнним. Биллэн турар, киһи быһыытынан олус сайынным. Араас дьону барыларын кытта уопсай тыл булар буоллум. Маны таһынан, юнкордуурум инники идэбин таларбар олук буолла. Инникитин медиа эйгэни кытары ыкса үлэлиир былааннаахпын.
***
Алёна Федорова, “StepMedia” пресс киин, И.Г. Тимофеев аатынан Майа лиссиэйэ, Мэҥэ Хаҥалас:
– Мин 2023 сылтан медиа эйгэни кытта сибээстээхпин уонна бу кэрчик иһигэр элбэххэ үөрэммитим: тиэкиһи өйдөөн ааҕарга, араас ыстатыйалары суруйарга, камера иннигэр куттаммакка, толлубакка саҥарарга. Ити сатабылларым миэхэ тус олохпор олус көмөлөһөллөр. Бу дьарыкпын
сөбүлүүбүн уонна инники үлэбин бу дьыаланы кытта сибээстиир санаалаахпын. Онон мин Федор Федоровичка, медиа бөлөх наставнигар, оскуолам выпускниктарыгар Нюргуяна Макароваҕа, Айыына Ачикасоваҕа, Анджелина Черкашинаҕа махталым муҥура суох.
***
Диана Игнатьева, «Түмэн» медиа киин, Ф.Г. Охлопков аатынан Майа орто оскуолата, Мэҥэ Хаҥалас:
– Юнкор үлэтэ оҕолорго олус туhалаах буолар, ону таhынан инники олоххо элбэх сайдыы суолун арыйар. Миэхэ юнкор буоларым олус туhалаабыта: элбэх биир интэриэстээх оҕолору кытары билсэн, бочуоттаах дьоннортон интервью ылан, араас тэрээһиннэргэ кыттан, тэрийсэн турардаахпын. Ону таһынан, бэйэҥ билииҥ-көрүүҥ кэҥииригэр даҕаны, дьону кытта алтыһа үөрэнэргэ даҕаны.
***
Анна Потапова, «Түмэн» медиа киин, Ф.Г.Охлопков аатынан Майа орто оскуолата, Мэҥэ Хаҥалас:
– Юнкор үлэтэ, мин санаабар, оҕолору кытта бииргэ үлэлииргэ, дьону кытта алтыһарга көмөлөһөр. Бэйэҥ кыаххын сайыннарар. Ис дууһаҕын арыйар.
***
Илона Руфова, «Эрэл» пресс киин, Өрөспүүбүлүкэтээҕи лиссиэй-интэринээт, Дьокуускай:
– Юнкор оҕоҕо элбэх сатабылы, кыаҕы, олоххо ураты көрүүнү биэрэр. Холобур, мин саха тылынан саҥарарым уонна суруйарым сайынна, камераттан уонна дьонтон кыбыстарым суох буолбута. Юнкордуур саамай үчүгэйэ диэн оҕону үлэлииргэ, билиигэ тардыһарга, инникигэ эрэллээх буоларга үөрэтэр.
***
Вадим Колесов, «Мичээр» медиа киин, А.П. Илларионов аатынан Хайахсыт орто оскуолата, Чурапчы:
– Юнкор буолуу миэхэ олус элбэх бастыҥ хаачыстыбалары сайыннарда. Бастатан туран, Норуоттар икки ардыларынааҕы 8-с «Азия оҕолоро» оонньууларын сырдатыыга биир саастыылаахтарбын кытта хамаанданан үлэлииргэ үөрэммитим. Лидер диэн тыл суолтатын уонна салайар киһи хайдах буолуохтааҕын билбитим. Маны таһынан, юнкор буоламмын билиибин-көрүүбүн, сахалыы тылбын, сахалыы толкуйбун чиҥэтэн сайыннардым.
***
Светлана Заровняева, «Мичээр» медиа киин, А.П. Илларионов аатынан Хайахсыт орто оскуолата, Чурапчы:
– Юнкор мин сайдыыбар олус көмөлөстө дии саныыбын: дьону кытта биир тылы булан алтыһарга, сатаан бодоруһарга, дьону кытта санаабын үллэстэргэ, билиибин-көрүүбүн кэҥэтэргэ, тулалыыр эйгэбэр буола турартан үчүгэйи, үйэлээҕи, кэрэни өйдөөн таба көрөргө. Манна барытыгар үөрэппит, сүбэлээн-амалаан илдьэ сылдьыбыт медиа кииммит салайааччытыгар Саргылана Прокопьевна Леонтьеваҕа махтанабын.
***
Арина Сотникова, «Тумус кыһа» медиа киин, С.К. Макаров аатынан Чурапчы гимназията:
– Мин «Тумус кыһа» медиа кииҥҥэ киирбитим олус соһуччу этэ. Ол эрээри бу мин олохпор буолбутуттан олус үөрэбин. Оскуолатааҕы кэмнэрбин киэргэттэ. Биир санаалаах дьону кытта биир хамаанда буолан үлэлээн кэлбитим миэхэ улахан уопут буолла. Спорт, айти, култуура хайысхаларыгар тэрээһиннэри сырдатан, «Кэскил» оҕо бэчээтин кыһатын юнкорунан үлэлээбитим, өрөспүүбүлүкэбит биллиилээх дьонуттан кытта көрсөн интервью ылбытым олохпор улахан суолаталаах дии саныыбын. Салайааччыбар Саргылана Гаврильевна Марковаҕа истиҥ махталбын тиэрдэбин. Кини биһиэхэ сайдыыны, үгүс үөрүүнү, үлэҕэ уонна суруналыыстыкаҕа тапталы иҥэрдэ. Юнкордаабатаҕым эбитэ буоллар, мин билиҥҥим курдук буолуом суоҕа этэ.
***
Алина Местникова, «Тумус кыһа» медиа киин, С.К. Макарова аатынан Чурапчы гимназията:
– Юнкордуур миэхэ элбэх үөрүйэҕи, сатабылы иҥэрдэ, кэрэ түгэннэри, доҕоттору бэлэхтээтэ. Чаҕылхай түгэннэри, кэрэхсэбиллээх дьону өрүү өйдүү-саныы сылдьыам. Саамай өйдөөн хаалбыт түгэним ааспыт сайын «Боотур Уус сыдьааннара» бырагыраама чэрчитинэн оҕо-аймах улуустааҕы ыһыаҕар юнкор быһыытынан үлэлээбитим буолар. Оҕо-аймах ыһыаҕын араас өттүттэн көрөн, сырдатан, урут билбэтэхпин билбитим, бэйэбэр туох саҥаны арыйбыппын суруйан, хаартыскаҕа түһэрэн, дьон санаатын истэн ааҕааччылары кытта үллэстибитим.
***
Ангелина Данилова, «Ил Ситим» медиа киин, В.И. Ленин аатынан Уолба орто оскуолата, Таатта:
– Юнкор буоламмын мин элбэҕи ситистим. Ыстатыйалары суруйаммын сайынным: бэйэм санаабын суруйарга, сааһылыырга, дьону кытта сатаан алтыһарга үөрэнним, хаһыат эйгэтин кытта билистим, олохпор буолбут түгэннэри үйэтиттим. Бэйэбин кытта саастыы юнкордар суруйалларын ааҕаммын билиим-көрүүм кэҥээтэ. Саха тылын экзаменыгар, саха тылын, литературатын олимпиадаларыгар юнкор үөрүйэҕим улаханнык көмөлөспүтэ. Инники олохпор өссө да көмөлөһүө дии саныыбын.
***
Кюннэй Карманова, 11 «А» кыласс, «Filmmaking» медиа киин, Арктическай оскуола, Дьокуускай:
– Юнкордаабыт сылларым тухары олус элбэх сатабылы иҥэринним, ол киһи буолан сайдарбар улахан оруоллаахтар. Кэлбит информацияны кэмигэр анаарарга, дьону кытта алтыһарга, хамаандаҕа үлэлииргэ үөрэнним. Бэчээттэнэр матырыйаалларым күүспэр күүс, сэниэбэр сэниэ эбэллэр этэ, ону таһынан эппиэтинэс эмиэ баар буолбута. Юнкордаабыт кэмим араас ааннары арыйар олоҕум биир сүрүн кэрчигэ буолар.
***
Айсен Устинов, “StepMedia” пресс киин, И. Г. Тимофеев аатынан Майа лиссиэйэ, Мэҥэ Хаҥалас:
– Мин сайдарбар медиа студия улахан оруолу оонньообута. Бу социальнай наукалары олус таарыйар эйгэ. Ону үчүгэйдик өйдүүр буоллум уонна олохпор туттуохпун сөп.
***
Данил Солдатов, «Чуурукта» пресс киин, Н.М. Заболоцкай аатынан Томтор орто оскуолата, Өймөкөөн:
– Сурунаалыыс идэтин баһылыам диэн хаһан да санаабатаҕым. Миэхэ бэйэбэр кинематограф ордук чугас. Ол эрээри суруналыыстыыр олус интэриэһинэй эбит. Суруналыыс үлэтэ – айар үлэ, онно киһи ис кыаҕа сайдар. Онон бэйэҕэр ордук эрэллээх, дьону кытта сатаан алтыһар, олоххо ордук үчүгэйдик сыһыаннаһар буолаҕын. Юнкордааммын мин суруйарга, кэпсииргэ, кэпсэтэргэ, дьон иннигэр тыл этэргэ үөрэнним.
***
Сайаана Сорокоумова, «Тэтим-life» медиа киин, С.А. Новгородов аатынан Чурапчы орто оскуолата:
– Юнкордуур кэмим мин олохпор элбэх саҥаны киллэрдэ дии саныыбын. Холобур, саҥа доҕоттору, хатыламмат түгэннэри, билиим-көрүүм да олус кэҥээтэ. Юнкордуурум элбэххэ үөрэттэ, сайыннарда уонна киһи үгүс табаарыстанар эбит.
***
Юрий Мохначевскай, «kyn.ru» пресс киин, Күндэйэ орто оскуолата, Сунтаар:
– Юнкорунан үлэлиирим бэйэм сайдарбар олус туһалаата. Пресс кииҥҥэ сылдьыахпыттан, дьону кытта сатаан кэпсэтэр үөрүйэҕим сайынна, видео да устарым күүһүрдэ.
***
Эмилия Охотина, «ТЛ» медиа киин, А.Е Мординов аатынан Тааттатааҕы лицей:
– Мин олохпор юнкордаабыт сылларым улахан суолталаахтар, инникигэ эрэллээхтик хардыылыырга тирэх оҥордо. Оскуола саастан журналистика эйгэтигэр сыстарым, онон бу идэни баһылыыр сыалбар сирдээн тиэрдэр күүс буолар.
***
Арылхан Перевалов, ”LegMedia” пресс киин, Лөгөйдөөҕү лиссиэй-интэринээт, Уус Алдан:
– Биһиги кыра кылаастан уус-уран ааҕыыларга, ырыа күрэхтэригэр кыттарбыт. Ол иһин дьон, камера иннигэр толлубакка саҥарабыт. «Кэскил» оҕо бэчээтин кыһатын кытта «СААС» мобильнай сыһыарыы видео уруоктарыгар кыттыыны ыллыбыт. Биллэн турар, бу үлэбит биһи гири элбэххэ үөрэттэ дии саныыбыт.
***
Радомир Федоров, ”LegMedia” пресс киин, Лөгөйдөөҕү лиccиэй-интэринээт, Уус Алдан
– Бииргэ үөрэнэр доҕотторбун, оҕолорбун кытары медиа киин үлэтигэр кыттыыны ылбыппыт бэйэбит инники олохпутугар туһалаах буолуоҕа.
***
Афанасий Канаев, «ТЛ» медиа киин, А.Е Мординов аатынан Тааттатааҕы лиссиэй:
– Оскуолам медиа киинигэр киирэн баран бэйэбэр олус атын ситими арыйдым, Ольга Васильевнаны кытта үлэлээммин медиа туһунан элбэх саҥаны биллим. Аан бастаан кып-кыра хостон саҕалаан үлэлээбиппит, ол эрэн ис сүрэхпититтэн баҕалаах, интэриэһиргиир буоламмыт үөрэ-көтө видео сюжет оҥорор этибит. Билигин толору хааччыллыылаах студиялаахпыт, онон үлэбит таһыма да уларыйда. «Кэскил» оҕо бэчээтин кыһатыгар коммуникация улахан оруоллааҕын өйдөппүккүтүгэр уонна инники идэбин таларбар олук буолбуккутугар олус махтанабын.
keskil14.ru