Балаҕан ыйын 8 күнүгэр оскуолабытыгар ураты, долгутуулаах көрсүһүү буолан ааста. Танда оскуолатын 45 сыл аннараа өттүгэр бүтэрбит, 1981 сыллаах выпускниктар билии ылбыт кыһаларыгар ыалдьыттаатылар.
Бу кэрэ бэлиэ күҥҥэ кинилэр бэйэлэрин үөрэммит кэмнэрин, оҕо саастарын санаан аастылар, истиҥ ахтыыларынан уонна олохторун уопутутуттан үллэһиннилэр, үөрэппит учууталларын махтана ааттаатылар. Бэһистэн ахсыс кылааска диэри иитэн-үөрэтэн таһаарбыт тапталлаах кылаастарын салайааччылара Октябрина Романовна Антипина (Тимофеева) оҕолорун кытта бииргэ сылдьыста.
– 45 сыл аннараа өттүгэр Танда оскуолатыгар балтараа сүүстэн тахса оҕо үөрэнэр этэ. Билигин 64 оҕо эрээри – санааҕытын түһэримэҥ. Оскуола үөрэнээччилэрин ахсаанынан буолбакка, үөрэнээччилэрин ситиһиилэринэн албан аатырар. Онон үчүгэйдик үөрэниҥ, Бартыһаан Дьөгүөрэп эппитин курдук, «үөрэҕи кытаатыҥ». Үчүгэй, билиилээх дьон-сэргэ буола улаатыҥ. Эһиэхэ бука барыгытыгар үөрэххитигэр кыһаллын, сөбүлүүр дьарыккытынан дьарыктанан, сөбүлүүр идэҕитигэр эрдэттэн бэлэмнэнэн, олоххо миэстэҕитин буларгытыгар уонна олоххут суолун устата доруобай, дьоллоох буоларгытыгар баҕарабыт. Инникитин эһиэхэ үтүө, сырдык, киэҥ олох аартыга арылыннын, – диэн алгыс тылларын эттилэр.
Выпускниктар кылаастарын аатыттан оскуолабыт дириэктэригэр Константин Георгиевич Готовцевка эҕэрдэ сурук туттардылар. Ону тэҥэ, биһиги, үөрэнээччилэр, өссө ордук ситиһиилээхтик үөрэнэрбитигэр, билии ыларбытыгар уонна бу үөрүүлээх күнү өйдүү сылдьарбытыгар анаан оскуолаҕа сыаналаах бэлэхтэри туттардылар. Оскуолабыт интернатын таһыгар мас олортулар.
Олус интэриэһинэй, суолталаах көрсүһүүнү тэрийбит, оскуолаларын умнубакка кэлэн ыалдьыттаабыт выпускниктарга дириҥ махталбытын тиэрдэбит.
Күндүүнэ ЕГОРОВА, IX кылаас,
М.Н. Готовцев аатынан Танда орто оскуолата, Уус Алдан