Бүгүн Наука эйэ уонна сайдыы иһин аан дойдутааҕы күнэ бэлиэтэнэр. Дьааҥы улууһун Боронук орто оскуолатын оҕолоро сыл ахсын араас таһымнаах кэмпириэнсийэлэргэ ситиһиилээхтик кытталлар. «Сиккиэр» эдкорпост салайааччыта Акулина Трофимовна Стручкова оҕолору чинчийэр үлэнэн дьарыктаналларыгар көҕүлүүр.
Лена Заборовская:
Мин 3-с кылааска сылдьан, ол эбэтэр 2016 сыллаахха, аан бастаан «Юный изыскатель» диэн күрэххэ кыттыбытым. Салайааччым Катерина Романовналыын сахалыы остуол оонньуутун оҥорбуппут. Оонньуу сорудахтарыгар оҕо өйүн сайыннарар, тулалыыр эйгэтин туһунан өйдөбүлү тэнитэн биэрэр ыйытыылары толкуйдаабыппыт. 2017 сыллаахха Максим Другинныын салайааччыбыт Сардаана Михайловнаны кытта Петр Тобуруокап айымньыларыгар олоҕуран, сүрдээх интэриэһинэй үлэни оҥорон таһаарбыппыт. Онно биһиги сайын лааҕырга сылдьан устубут кылгас киинэбитин ырыппыппыт. Онтон 2018 сыллаахха Акулина Трофимовналыын уонна Александра Яковлевналыын «Саха уонна аангылыйа таабырыннарын уратытын, майгыннаһар өрүттэрэ» диэн тиэмэҕэ олус үчүгэй үлэни таһаарбыппыт, ол курдук бу икки араас норуот майгыннаһар уонна уратылаһар да өрүэ баар диэн түмүккэ кэлбиппит. 2019 сыллаахха биһиги «Т.Е. Сметанин хоһоонноругар антитеза туттуллуута» диэн тиэмэҕэ интэриэһинэй, араас таабырыннардаах үлэ суруйбуппут. Оҕо тоҕо науканан дьарыктаныахтааҕый? Тоҕо диэтэххэ, билиҥҥи үйэҕэ наука туохха барытыгар баар. Ханна да хайыс, онно наука баар. Наука диэн, бастатан туран, үөрэх. В.И.Ленин эппитин курдук, «үөрэниэххэ, үөрэниэххэ, өссө төгүл үөрэниэххэ!»
Маша Мордовская:
Мин эмиэ бастакыбын 3-с кылааска «Юный изыскатель» диэн күрэххэ кыттыбытым. Ити наукаҕа бастакы хардыым этэ. Тиэмэм аата: » Ньиэмэс чаанньыгын кэпсээнэ». Салайааччым Стручкова Акулина Трофимовна бэлэмнээбитэ. Бу үлэни толорорбутугар чаанньыгы түмэлгэ (мусуойга) туттарбыт дьон ахтыыларын хомуйбуппут, чаанньык бэлиэтин чинчийбиппит, араас энциклопедиялары хаһыспыппыт. Кыттан, 3 миэстэни ылбытым. Акулина Трофимовна наукаҕа «харахпын арыйан” биэрбитэ. Ол иһин киниэхэ махтаныам этэ. Ол курдук чинчийэр үлэҕэ хас сыл аайы кыттар буолбутум. 4 кылааска «Дьааҥы остуоруйатын уруһуйга түһэрии» үлэбэр эмиэ Акулина Трофимовна көмөлөспүтэ. Биһиги Дьааҥы остуоруйаларыттан «Биэс ынахтаах Бэйбэрикээн эмээхсин», » Чаркый икки Барыллыа эмээхсин», » Үчүгэй Үдьүйээн уонна Куһаҕан Ходьугур», » Оноҕосчоон Чуокаан уонна Омоон Долоон» диэн остуоруйалары аахпыппыт, ырыппыппыт. 5 кылааска «Шаг в будущее» кэмпириэнсийэҕэ кыттар буолбутум. Рози Семеновна уонна Саргылана Петровна бэлэмнээбиттэрэ. Тиэмэм «Морфология и биология золотого карася» диэн. Нууччалыы тылынан көмүскээбитим. Бу чинчийэр үлэбитигэр собону үөрэппиппит. Эмиэ бэрт интэриэһинэй этэ. 6 кылааска дьүөгэм Оксана Аммосовалыын » Саха алыптаах остуоруйаларыгар Алаа Моҕус уобараһа». Салайааччыбыт — Акулина Трофимовна. Араас остуоруйаларыга Алаа Моҕуһу хайдах уобарастаан суруйалларын тэҥнээбиппит. Мин Акулина Трофимовнаҕа махтанабын уонна хас сыл аайы кыттыам диэн эрэннэрэбин. Бастакы хардыыбын оҥорорго кини көмөлөспүтүн хаһан да умнуом суоҕа!
Наташа Степанова:
Мин наукаҕа бастакы хардыым «Байанай оонньуута» диэн тиэмэнэн кыттыым этэ. Ити оонньуубун оҥорорбор «Кыһыл кинигэҕэ” баар кыыллары киллэрбитим, ити кыыллары хас биирдии киһи билиэхтээх уонна харыстыахтаах дии саныыбын. Ити кыыллары дьон үчүгэйдик билбэттэр, ол иһин бу тиэмэни талбытым. Маны таһынан, өбүгэлэрим туһунан үлэ суруйбутум. Мин санаабар, хас биирдии киһи бэйэтин өбүгэлэрин хас да көлүөнэни билиэхтээх. Онно кэпсиирбэр бэйэм санаабын этэн, 3 истиэпэннээх диплому ылбытым. Мин хас биирдии киһиэхэ наадалаах тиэмэлэри тала сатыыбын. Онон маннык түмүккэ кэлиэххэ сөп: хас биирдии киһи бары «Кыһыл кинигэҕэ” киирбит кыыллары уонна өбүгэлэрин билиэхтээх!
Максим Другин:
1-4 кылаастарга олонхонон дьарыктаммытым. Наукаҕа маҥнайгы хардыым диэн 4 кылааска «Эрчимэн Бэргэн» диэн олоҥхо олоҕун, дьоруойдарын үөрэппитим буолар. Сардаана Михайловна Горохова салайбыта. Онтон 5 кылааска «Хаан Дьаргыстай” диэн Дьааҥы олоҥхотун үөрэтэн саҕалаан, быйыл Акулина Трофимовна Стручкова салайыытынан 3-с сылбын үөрэтэбин. Аан бастаан «Инникэгэ хардыыга» кэмпириэнсийэҕэ олоҥхо дьоруойдарын үөрэтэн кыттыбытым,онтон кэлэр сылбар — олоҥхо олоҕун-дьаһаҕын. Айылҕаны харыстыыр экология науканы эмиэ үөрэппитим. Салайааччыларым — Рози Семеновна уонна Саргылаана Петровна Слепцовалар. Бу экология тиэмэтинэн кэмпириэнсийэҕэ «Сосновый бор» сынньалаҥ лааҕырыгар сылдьан, кыттыбытым.