Елена Копырина оҕолорго анаан бириэмэни хайдах сөпкө аттарар туһунан биһиги сайтпытыгар анаан матырыйаал бэлэмнээтэ. Кини түөрт оҕолоох ыал ийэтэ, тыл үөрэхтээҕэ, сахалыы күннүктэр ааптардара, бастакы сахалыы “Истиҥ” подкаст ааптара, ыытааччыта, “Кэрэ эйгэ” онлайн-кулууп тэрийээччитэ. Инстаграмҥа сирэйэ: @elena_kopyrina_
Кэм-кэрдии ааһара олус түргэн. Хас биирдии киһи оҕо эрдэҕиттэн бириэмэни сөпкө аттарар буоллаҕына, олох араас эйгэтигэр ситиһиилээх буолар. Күнү-дьылы мээнэ халтайга ыытар киһи олус чуҥкук олоҕу олорор. Аан дойду саамай ситиһиилээх дьоно бары күнү-дьылы былаанныыры, сыалы-соругу туруорары, ситиһэри сатыыллар. Бириэмэни сөпкө туһанар туһунан тэттик сүбэлэри эйиэхэ анаан бэлэмнээтим.
1. Күнү-дьылы кумааҕыга суруйан былаанныыр ордук. Билигин онно аналлаах блокнот, ежедневник, күннүк арааһа олус элбэх. Дьоҥҥун кытта бэйэҥ сөбүлүүргүн талан ылыаххын сөп. Эбэтэр блокнокка, тэтэрээккэ, альбомҥа бэйэҥ баҕараргынан уруһуйдаан, киэргэтэн, оҥостуоххун сөп.
2. Хас биирдии оҕо, үөрэнээччи саамай сүрүн үлэтэ үөрэх буолар. Бастатан туран, күн аайы оскуолаҕа үөрэнэҕин, дьиэҕэ үлэҕин толороҕун. Онон күҥҥүн уруоктарын хаска саҕаланалларыттан, бүтэллэриттэн көрөн, былааннаа. Күнүн былаана ханнык сменаҕа үөрэнэргиттэн тутулуктаах.
3. Аан бастаан күҥҥүн былаанныы үөрэн. Сарсыарда 8 чаастан үөрэнэр буоллаххына , хаска турдаххына ороҥҥун хомуйан, суунан-тараанан, аһаан, таҥнан, оскуолаҕар айанныаххын нааданый? Эбэтэр дьиэҕэр (дистанционно) үөрэнэн саҕалыыгыный? Дьоҥҥун кытта сүбэлэс.
4. Дьиэтээҕи үлэҕин оскуолаҥ үөрэҕин кэннэ биир чаас кэриҥэ сынньанан, үчүгэйдик аһаан-сиэн баран оҥорор курдук былааннаа. Дьиэҕэ үлэҥ олус элбэх буоллаҕына, эмиэ уруокка курдук, сорудахтаргын кыратык сынньанан ыла-ыла оҥор, толор.
5. Аны былааҥҥар үөрэҕин таһынан тугу гынаргын киллэр. Куруһуоктар, секциялар, эбии дьарык сүрүн үөрэххэр, уруоктаргар мэһэйдээбэт буолуохтаахтар. Быыскар сынньанар, тохтоон ылар, аһыыр бириэмэлээҕин ордук.
6. Сынньалаҥҥын эмиэ былааҥҥар киллэр. Хайдах сынньанаргын сөбүлүүгүнүй? Сынньалаҥҥар наар төлөпүөнүнэн эрэ оонньоомо. Атыҥҥа эмиэ аралдьый. Төлөпүөнтэн атын киһи аралдьыйара олус элбэх – конструктор, уруһуй, кырааска, пластилин, пазл, интэриэһинэй кинигэ, кубик-рубик о.д.а. Бииргэ төрөөбүттэргин, төрөппүттэргин кытта оонньоо. Таһырдьа, сибиэһэй салгыҥҥа төһө кыалларынан элбэхтик сылдьа сатаа. Дьэҕэр үлэлээ, дьоҥҥор көмөлөс.
7. Туһалаах үөрүйэхтэргэ кыра-кыралаан эмиэ үлэлэһиэххэ сөп. Холобур, сарсыарда аайы сэрээккэ, сынньалаҥҥар кинигэ ааҕыыта. Кыраттан саҕалыахха сөп. Сэрээккэни – 3 мүнүүтэ оҥорууттан, кинигэ ааҕыытын – 5 сирэйтэн. Таблица, трекер оҥостон, күн аайы, көтүппэт курдук, бэлиэтэнэн ис.
8. Төрөппүттэргэр дьиэҕэ-уокка тугу көмөлөһөргүн чуолкайдаа, умнубат курдук былааҥҥар киллэр. Наһаа элбэхтэ этиттэрбэккэ, тустаах үлэҕин бэйэҥ көрөн оҥоро сылдьарыҥ дьоҥҥор саамай үчүгэй көмө буолар.
9. Режимҥин тутус. Киэһэ аайы хаска утуйаргын, сарсыарда хаска сытаргын быһаар. Киһи этэ-сиинэ, өйө-санаата үчүгэйдик утуйар буоллаҕына, биирдэ сынньанар, чөлүгэр түһэр. Түүннэри эбэтэр күнү быһа төлөпүөн, тэлэбиисэр, гаджет көрөр доруобуйаҕа олус буортулаах.
10. Күҥҥүн былаанныы үөрэннэххинэ, нэдиэлэнэн былааҥҥа көһүөххүн сөп. Ол туһунан бу keskil14.ru сайтка туспа гайд баар буолуоҕа.
СОРУДАХ:
1) Күҥҥүн-дьылгын былаанныырга аналлаах тэтэрээт, блокнот оҥоһун эбэтэр ежедневник, күннүк атыылас.
2) Сарсыҥҥы күҥҥүн былааннаан көр. Улахан киһини кими эмэ көмөлөһүннэр, сүбэлэт.
3) Былааҥҥын олоххо киллэр. Киэһэ олорбуккун сот эбэтэр хайдах эмэ бэлиэтээ.
4) Киэһэ утуйаргар тугу ситиспиккин, ситиспэтэххин ырытан көр.
5) Сарсыҥҥы күҥҥүн былааннаа. Салгыы маннык баран ис.
Ситиһиилэри!