Балаҕан ыйын 1 күнүгэр Арассыыйа бары оскуолаларыгар Билии күнүн бэлиэтээтибит. Биһиги оскуолабытыгар бу күн «Билии күнэ. Кэлэр кэм» диэн ис хоһоонноохтук ыытылынна. Үөрэх дьылын саҕалыыр үөрүүлээх тэрээһини учууталларбыт, төрөппүттэрбит бэлэмнээн ыыттылар.
Бу көннөрү бырааһынньык, үөрүү-көтүү эрэ буолбакка, оскуола үөрэнээччилэригэр билиини кытта сибээстээн, кэлэр кэм туһунан толкуйдатта, ол туһунан элбэх санаалар этилиннилэр. Оҕолор, учууталлар уонна төрөппүттэр оскуола тула түмсэн, билии күнүн үөрүүтүн тэҥҥэ үллэһиннилэр. Быйылгы үөрэх дьылын выпускниктара уонна быйыл оскуолаҕа саҥа киирбит оҕолор бу көннөрү үөрэнээччилэр эрэ буолбакка, кинилэр Билии күнүнүн кэмин ситимниир улахан эппиэтинэстээх дьон буолалларын туһунан бэлиэтээн эттилэр. Маҥнайгы чуорааны тыаһатар чиэс 11-с кылаас үөрэнээччитигэр Айтал Григорьевка уонна 1-кы кылаас үөрэнээччитигэр Алиса Артемьеваҕа бэрилиннэ.
Билии күнүгэр оскуола салалтата, дириэктэрбит Петр Петрович Тарасов, нэһилиэк тэрилтэлэрэ, общественнай түмсүүлэр, төрөппүттэр оҕолорго элбэх үтүө тылларын анаатылар. Оскуолабытыгар саҥа учууталлар атын улуустан, куораттан үлэлии кэллилэр. Онон информатика, история, нуучча тылын, геометрия, география, биология предметтэригэр саҥа учууталларбыт көмөлөрүнэн билиибитин байытыахпыт. Үөрэнээччилэр учууталларбытын кытта өйдөһөн, өйөһөн, бииргэ айымньылаахтык үлэлээн, үөрэнэн, дьоһуннаах билиини ситиһиэхпит, кэскиллээх олоххо бэлэм буоларга дьулуһуохпут диэн эрэнэбин.
Сайаана ФЕДОРОВА, VII кылаас,
С.Д. Флегонтов аатынан Хадаар орто оскуолата, Чурапчы