Балаҕан ыйын 1 күнэ – биһиэхэ хас биирдиибитигэр күндү, долгутуулаах күн. Оскуола боруогун атыллаабыт маҥнайгы күммүн санаатахпына, билигин да сүрэҕим мөҕүл гынар. Быйыл бастакы кылааска киирэр кырачааннары көрө туран, барыбыт харахпытыгар оҕо сааспыт кэрчиктэрэ көстөн аастылар.
Нэһилиэкпит үрдүнэн ааспыт сыл бүтүүтэ оскуолабытыгар аҕыйах оҕо киириэ диэн куттал баара. Ол эрэн, Семен Дмитриевич Флегонтов аатынан Хадаар орто оскуолатыгар быйылгы үөрэх дьылыгар 11 оҕо оскуола боруогун атыллаан, олус үөрдүбүт, киэн тутуннубут. Ол аата биһиги нэһилиэкпит инники кэскилэ баар. Мин таптыыр Хадаарым барахсан сайдан иһэрэ үчүгэйин! Ордук астыммытым диэн — биһиги нэһилиэкпит ыччаттара дойду араас муннуктарыттан үөрэнэн-сайдан, төрөөбүт-үөскээбит Халыҥ Хадаардарыгар төннөн, дьиэ кэргэттэрин илдьэ көһөн кэлбиттэрэ буолар. Ити биһиэхэ, эдэр көлүөнэҕэ, төрөөбүт дойдуга тапталы, бэриниилээх буолууну уонна Хадаарбыт өссө да чэчирии сайдыаҕа диэн улахан эрэли саҕар.
Кырачаан доҕотторбутугар, бастакы кылаас үөрэнээччилэригэр, биһиги, 11-с кылаастар, ис сүрэхтэн тахсар алгыс тыллардаах самолетиктары уонна үйэлэргэ хаалар «Капсула времени» туттардыбыт. Долгуйан туран, мин эмиэ 11-с кылаас аатыттан истиҥ эҕэрдэбин тиэртим.
Үөрэх дьылын саҕалыыр бастакы чуорааны оскуолабыт бастыҥ спортсмена Айтал Григорьев уонна оскуола боруогун аан бастаан атыллаабыт Алиса Артемьева тыаһаттылар.
Саҥа күүс — саҥа учууталлар
Оскуолабыт састаабыгар быйыл 5 эдэр, эрчимнээх учуутал үлэлии кэллэ: биология, география учуутала Туйаара Николаевна; математика учуутала Ян Егорович; история учуутала Евгений Александрович; нуучча тыла уонна литературатын учуутала Раиса Егоровна.
Маны таһынан, «Оҕо саас сирдьиттэрэ» тирэх киинтэн Яна Иннокентьевна ананан, айымньылаахтык үлэтин саҕалаата. Оттон үөрэх эйгэтин дириэктэрин солбуйааччынан анаммыт Фелицина Александровна салайар үлэҕэ саҥа тыыны киллэриэҕэ диэн эрэнэбит. Олохтоох учууталларбыт саҥа кэлбит коллегаларыгар сэмэй бэлэхтэрин туттаран, илии тутустулар. Уопуттаах ветеран учууталларбыт кэс тылларын этэн, эдэрдэргэ муударай сүбэлэрин биэрэн, алгыстарын анаатылар.
***
Хадаар оскуолата саҥа үөрэх дьылын саҥа күүһүнэн сарсыҥҥыга эрэллээх көрүстэ. Инникитин даҕаны үөрэнээччилэрбит үөрэххэ бастыҥ көрдөрүүлэринэн, спорка кыайыыларынан-хотууларынан, уопсастыбаннай олоххо көхтөөх кыттыыларынан төрөөбүт нэһилиэктэрин, улуустарын ааттата туруохтара диэн бигэ эрэллээхпин.
Бу сыл миэхэ, 11-с кылаас үөрэнээччитигэр, ураты эппиэтинэстээх, долгутуулаах сыл. Биир кэлим эксээмэммин чиэстээхтик туттараммын, сөбүлүүр идэбэр киирэн, үөрэх-билии үрдүк чыпчаалын дабайыам диэн бүк эрэллээхпин. Биһиэхэ холобур буолбут убайдарбыт, эдьиийдэрбит суолларынан, төрөөбүт дойдум Хадаар сайдарын туһугар туһалаах дьон буолан тахсыахпыт.
Аристарх ЛУКИН, XI кылаас,
С.Д. Флегонтов аатынан
Хадаар орто оскуолата, Чурапчы