Мин, Дьулустаан Уранаев, атырдьах ыйыгар буолбут улахан кыайыым кэнниттэн, КВН аартыгын туһунан санаабын, бу оонньуу олоҕум биир сүрүн чааһа буолбутун туһунан үллэстиэм.
КВН-ҥа тапталым 8-с кылааска, «Ситик» оҕо тэрилтэтигэр киирбитим кэнниттэн уһуктубута. Онтон ыла бу оонньуунан сөбүлээн дьарыктанабын. «Ситикпэр», салайааччыбар Матрена Дмитриевна Алексееваҕа улахан махтал! Кини миигин сыанаҕа бастакы хардыыларбын оҥорорго көмөлөспүтэ, кыбыстыыны кыайарга үөрэппитэ. Төрдүс сылбын сөбүлээн дьарыктанабын. Элбэҕи биллим, өссө иннибэр үтүө кэмнэр күүтэллэр диэн санаам күүһүрэр.
Быйыл мин Саха сирин КВН хамаандатыгар талыллан, «АЙС» хамаанда чилиэнэ буоллум. Уһук Илин, Сибиир уонна Ураал оскуолатын хамаандаларын икки ардыларыгар ыытыллыбыт КВН бэстибээлин «ГРАН-ПРИ» үрдүк аатын ыллыбыт! КВН бэстибээлэ олус үчүгэйдик ааста! Саамай өйдөөн хаалбыт түгэним диэн, атын хамаандалары кытта кэпсэтии, саҥа доҕоттордонуу буолар. Сыанаҕа тахсыы уонна көрөөччүлэри күллэрии олус астык!
Биһиги бары араас улуустартан хомуллан, бэйэ бэйэни кытта оонньуу нөҥүө билсэммит, өйдөһөммүт хамаанда тэриммиппит. Кыайыыбыт кистэлэҥэ хамаандабыт икки нэдиэлэ устата күүскэ, күн аайы бэлэмнэммитэ буолар. Ол гынан баран, сүрүн дьайыылаах күүһүнэн биһиги салайааччыбыт Евгений Филиппов бэлэмнээһинэ буолбута. Кини биһигини таба салайан, сөптөөх хайысханы биэрэн, барыбытын биир сыалга түмэн сирдээбитэ. Онон киниэхэ махталбыт муҥура суох!
КВН – элбэх көрүҥү, ньыманы баһылаан оонньуурга кыаҕы биэрэр буолан, тугуҥ барыта сайдар. Тылбыт-өспүт, толкуйдуур дьоҕурбут, артыыстыыр талааммыт – барыта сайдар. КВН миигин тургэнник толкуйдуурга, дисциплинаҕа уонна араас элбэх үчүгэйгэ үөрэттэ. Бу оонньуу миигин кэскиллээх киһи буоларга уһуйар, саҥа дьоҕурдары арыйар. КВН – миэнэ!
Бу ситиһиигэ төрөппүттэрим өйөбүллэрэ олус улахан суолталаах. Кинилэр өрүү аттыбар бааллара, миигин өйдүүллэрэ, санаабын бөҕөргөтөллөрө кынаттыыр.
Инникитин улахан лигаҕа тахсан оонньуохпун баҕарабын. КВН сыанатыгар бэйэбин өссө сайыннарыахпын, саҥа чыпчааллары дабайыахпын баҕарабын.
Бэстибээл кэмигэр элбэх саҥа доҕоттордоннум. Атын лигаҕа оонньуур олус атын эбит диэн санаатым. Саҥа дьоннуун билсэн, кинилэр көрүүлэрин, оонньууларын кэтиир олус кэрэхсэбиллээх эбит.
Эдэр ыччаты КВН-ҥа кыттарга ыҥырабын: «Бу оонньуунан кэрэхсэбиллээх оҕолортон ким даҕаны толлубакка КВН-ҥа кэлиҥ, бэйэҕитин холонон көрүҥ!» КВН – оҕону сайыннарар, дьоҕурун арыйар күүстээх эйгэ!
Дьулустаан Уранаев, “Ситик” оҕо тэрилтэтин лидерэ, Тааттатааҕы «Сатабыл» оҕо айымньытын дьиэтэ