Балаҕан ыйын 19 күнүгэр Лөгөй лиссиэй-интэринээтин 10 «А» уонна «Б» кылаас үөрэнээччилэрэ, ол эбэтэр «SANDA:R» айар бөлөх, VIII төгүлүн «КӨМҮС TYGEN» диэн уоттаах-күөстээх, ырыа-тойук, үҥкүү-битии аргыстаах умнуллубат күһүҥҥү көмүс түгэни улууспут, лиссиэйбит үөрэнээччилэригэр бэлэхтээтилэр.
Үгэскэ киирбит тэрээһиммит биир саамай күүтүүлэх чааһа ырыа доҕуһуоллаах ыалдьыттары көрсүү буолар. Ол курдук, «КӨМҮС TYGEN» open air-га үҥкүү киэһээтин ырыатынан киэргэппит DJ ERCH, алыптаах киэһэни иилээн-саҕалаан ыыппыт MC ERHAN SLEPSOV, эдэр кэскиллээх ырыаһыт Асик Сокорутов уонна ырыа аргыстаах чаҕылхай сулустарбыт ЛЭГЭНТЭЙ уонна ЕВГЕНИЙ ОЛЕНОВ буоллулар. Быйыл улууспут араас оскуолаларыттан 300 тахса оҕо, ыалдьыт сынньанан, үөрэн-көтөн, астынан, дуоһуйан аастылар. Маны тэҥэ быйыл хайа оскуолаттан уонна лиссиэйбит ханнык кылааһыттан элбэх оҕо кэлбитин көрөн, тэрийээччилэр минньигэс бэлэх туттардылар. Түмүккэ Мүрү 1 нүөмэрдээх орто оскуолата уонна лиссиэйбит 9 кылааһа бэлэх тутан үөрүүлэрэ үксээтэ.
Бу бырайыак номнуо VIII төгүлүн ыытыллан үөрэнээччилэр эрэ буолбакка, бөһүөлэк олохтоохторо, эдэр ыччат, биһиги, лиссиэйбит выпусниктара куруутун ахтан-санаан ааһар кэтэһиилээх кэрэ тэрээһиннэрэ буолар. Оскуолабыт таһа хаһааҥҥытааҕар даҕаны сылаас, эйэҕэс иэйиинэн туолла.
Тэрийээччилэргэ, «SANDA:R» бөлөххө уонна бу бырайыагы саҕалаабыт, сылын аайы тэрээһин үрдүк таһымҥа ааһарыгар күүс-көмө буолар Лөгөй лиссииэйин 2024 сыллаах выпускниктарыгар, оскуолабыт үлэһиттэригэр барҕа махтал!
Янис СЫСОЛЯТИН, lX кылаас,
Лөгөй лиссиэй-интэринээт, «SiTiM LegMedia» киин юнкора, Кэптэни, Уус Алдан
