«Манчаары оонньуулара» успуорт национальнай көрүҥнэрин XXII Спартакиадата быйыл Таатта улууһугар ыытыллаары турар. Улууһун, Тааттатын, чиэһин Ытык Күөл биир эдэр кэскиллээх гиревигэ Айсен Габышев көмүскүүргэ, кыттарга бэлэмнэнэ сылдьар. Кини быйыл 11 кылааһы бүтэрдэ, оскуолабыт «Ил Ситим» оҕо общественнай хамсааһынын бэрэссэдээтэлинэн таһаарыылаахтык үлэлээтэ. Мин Айсентан аҕыйах ыйытыыбар хоруйдууругар көрдөстүм.
Айсен кыра эрдэҕиттэн успуордунан дьарыктанар. Кинини аҕата успуорт эйгэтигэр сыһыарбыт эбит, бу эйгэҕэ маҥнайгы хардыыларын тустуу көрүҥүттэн саҕалаабыт. 2-8 кылааска диэри тустууга сылдьар, утумнаахтык дьарыктанар, ол эрэн бүтэһик курэҕэр улахан эчэйии ылан, хомурҕанын тоһутан, дьарыгын тохтоппут. Онтон 9-10 кылааска чэпчэки атлетиканан дьарыктанан саҕалыыр. Ол кэннэ, дьэ, гиирэ спордун сэҥээрэн, бу көрүҥҥэ бэйэтин булар, күүскэ дьарыктанар буолар. Ол курдук, Айсен номнуо 2-с сылын гиирэнэн дьарыктанар, бу көрүҥ күүстээх уонна тулуурдаах буолары ирдиир диэн өйдөттө. Дьарыкка бииргэ үөрэнэр уолаттара ыҥырбыттарын, бастакы умнуллубат кыайыытын, улуустааҕы күрэххэ биир ый дьарыктанан баран кыайыы өрөгөйүн туппутун, билигин «Манчаары оонньууларыгар» кыттаары күүскэ бэлэмнэнэ сылдьарын туһунан кэпсээтэ.
Гиирэ успуорда миэхэ элбэх билсиини-көрсүүнү биэрдэ, үгүс доҕор-атас баар буолла. Билиҥҥи тутаах сыалым диэн «Манчаары оонньууларыгар» миэстэлэһии буолар. Тренерим Иннокентий Иванович Бояров дьарыктыыра үчүгэй, сыралаах үлэм түмүгэ көстүө диэн эрэнэбин.
— диэн Айсен үллэстэр.
«Манчаары оонньууларыгар» Таатта чиэһин көмүскүүр Айсен Габышевка ситиһиилэри, кыайыыны-хотууну, эчэйиитэ суох дьарыктары баҕарабын.
Алексей Саввин, А.Е. Мординов аатынан Тааттатааҕы лиссиэй 9 кылааһын үөрэнээччитэ, Таатта