Ыам ыйын 9 күнүгэр Мэҥэ Хаҥалас улууһун Майа нэһилиэгэр Улуу Кыайыы үбүлүөйдээх 80 сылын көрсө күүтүүлээх тэрээһиммит үрдүк таһымҥа буолан ааста. Кыайыы кынаттаах күммүтүн сахалартан бастакы дьоруойбут Федор Кузьмич Попов пааматынньыгар, Кыайыы монуменыгар дьоруойдуу хорсуннук кыргыспыт буойуттарбыт албан ааттарыгар сүгүрүйэн, сибэкки дьөрбөтүн ууруу сиэринэн-туомунан саҕаламмыта. Үтүө үгэскэ кубулуйбут бүтүн Арассыыйатааҕы “Өлбөт үйэлээх полк” аахсыйаҕа ытыктыыр дьоммут ааттарын үйэтитэн, киэн туттуубутун тиэрдэн сэлэлии хаамыы тэрилиннэ.
Баһылай Манчаары аатынан стадиоҥҥа “Улуу Кыайыынан кынаттанан, эйэлээх олоҕу тутуоҕуҥ!” театрализованнай дьүһүйүүгэ 2250 киһи кытынна, военизированнай параакка улуус 30 оскуолаларыттан 42 взвод, барыта 1050 юнармеец кыттыыны ылан улуус историятыгар киирдилэр. Үүнэр көлүөнэ Кыайыы күнүгэр өрөгөйдөөх парада — Ытык дьоммутугар, сэрии уонна тыыл бэтэрээннэригэр, ытыктабылын, кинилэр сырдык ааттарын үйэтитиитин уонна хорсун быһыыларынан киэн туттарын бэлиэтэ.
Улуу Кыайыы үбүлүөйдээх 80 сылынан! Ким да умнуллубат, туох да умнуллубат!
Сандаара Скрябина,
В.П. Ларионов аатынан Майа орто оскуолатын 10 «Б» кылаас үөрэнээччитэ, Мэҥэ Хаҥалас