Биһиги гинмазиябытыгар сылын ахсын ыытыллар бастыҥ гимназистары чиэстиир «Созвездие талантов» диэн улахан тэрээһин буолан ааста. 2025 сылга Чурапчы гимназията 30 сыллааҕы үбүлүөйүн бэлиэтиибит. Онон бүгүҥҥү тэрээһин үбүлүөйдээх сылга ананна.
Кырачаан тииҥчээннэр үөрэ-көтө сүүрэн киирэн үҥкүүлээтилэр, үөрүүлээх бырааһынньыгы саҕалаатылар. Юрий Михайлович Слепцов, Алёна Борисовна Моисеева, Алгыстана Николаева Федорова, Евдокия Ксенофонтовна Ван-Чу-Лин эҕэрдэ тыл эттилэр. Гимназиябыт «Дьиэрэҥкэй» үҥкүү кэлэктиибин сэргэх нүөмэрэ бырааһынньыгы киэргэттэ.
Ол кэнниттэн күүтүүлээх түгэммит үүннэ. Быйылгы үөрэх дьылыгар араас хайысхаҕа ситиһиилээх үөрэнээччилэри бэлиэтээтилэр, «Гордость гимназии», «Надежда гимназии», «Пьедестал года», «Өркөн Өй», «Лучший исследователь года», «Творчество и поиск», «Звезда спорта», «Лучший общественник», «Молодые профессионалы» анал ааттарынан наҕараадалаатылар.
Ону тэҥэ үөрүүлээх быһыыга-майгыга Наука дьоҕус академиятын чилиэннэрин уонна чилиэн-кэрэспэдьиэн аатын сүкпүт оҕолорбутугар дастабырыанньаларын туттардылар.
Хаһааҥҥытааҕар да үрдүк таһымнаах буолла. Биһиги, «Правительство Гимназия» актыбыыстара, тэрээһинигэр сүүрэ-көтө сылдьыбыт буоламмыт, биир тыынынан ааспыт курдук.
Invent ырыаһыт кэлбитэ барыбытын долгутта. Олус үчүгэй соһуччу бэлэх буолла. Сөбүлүүр ырыаларбытын дуоһуйа ыллаһаммыт олус астынныбыт. Оттон тэрээһин түмүгэр минньигэс туортаах сандалыга олорон тото-хана аһаатыбыт. Бу курдук, биһиги гимназиябытыгар хатыламмат ураты күн ааста.
Ваня Лукин, X кылаас үөрэнээччитэ, «Гордость гимназии» анал аат хаһаайына:
– Оскуола иһинэн ыытыллыбыт «Созвездие талантов» тэрээһин миэхэ өйбөр умнуллубаттык хатанна. Үрдүк таһымнаахтык ыытыллыбытыттан киһи сөҕөр. Биллэр ырыаһыт Invent кэлэн ыалдьыттаабыта. Мин санаабар, бу тэрээһин саамай сүрүн суолтата оҕолор ситиһиилэрин сырдатыы буолар. Төрөппүттэргэ, ыалдьыттарга билиһиннэрии курдук буолар. Оҕо сыл иһигэр ситиспит ситиһиилэрин сыаналааһын киниэхэ улахан суолталаах буолар. Миигин оскуолам сыаналыыр эбит диэн санаа үөскүүр. Онон бүгүҥҥү күнтэн олус астынныбыт. Салгыы оскуолабыт сайдарын, тупсарын туһугар үлэлиэхпит-хамсыахпыт.
Айгылаана Богдокумова, IX кылаас үөрэнээччитэ, «Өркөн Өй» анал аат хаһаайката:
– Олус үчүгэйдик ааста. Тэрээһин V кылаас оҕолорун үҥкүүлэринэн саҕаланна. Гимназистар үөрэх дьылын түмүгүнэн үгүс ситиһиилэнэн, араас наҕараада, анал аат ыламмыт олус үөрдүбүт-көттүбүт. Саамай долгутуулаах түгэн – оҕолор сөбүлүүр ырыаһыттара Invent кэлэн ырыаларын бэлэх ууммута. Бу төрөппүттэрбититтэн, оскуолабыт үлэһиттэриттэн соһуччу бэлэх буолла. Кинилэргэ истиҥник махтанабыт!
Лилия Бурцева, X кылаас үөрэнээччитэ, «Лучший общественник» анал аат хаһаайката:
– Бүгүн биһиги оскуолабытыгар сылын ахсын ыытыллар «Созвездие талантов-2025» олус үчүгэйдик ыытылынна. Оҕолор бу күн үҥкүүлээн, ыллаан биһигини үөрдүбүттэрэ. Бу үөрэх дьылыгар көхтөөхтүк үлэлээбит, үөрэммит, араас куонкурустарга кыттыбыт оҕолорбутугар наҕараадалары туттардылар. Тэрээһиммит бүтүүтүгэр минньигэс тортар сыанаҕа тахсыбыттара, ону кытта күүтүүлээх ыалдьыппыт Invent кэлэн оҕолору үөрдэн, соһутан, ылбаҕай ырыаларын ыллаабыта тэрээһини эбии киэргэттэ. Онтон фуршекка минньигэстик аһаан-сиэн үөрэ-көтө дьиэбитигэр тарҕаспыппыт. Бу курдук, ураты күнү бэлэхтээбиттэригэр төрөппүттэрбитигэр, учууталларбытыгар, гимназиябыт үлэһиттэригэр барҕа махтал буоллун.
Оҕолор бүгүҥҥү күнтэн кынаттанан өссө элбэх ситиһиилэниэхтэрэ диэн эрэнэбит. Ситиһиилээх буолуохха, үүнэ-сайда туруохха. Invent «Мэлдьи сырдыы, сыдьаайа сылдьыҥ» диэн эппитэ өйбүтүгэр-санаабытыгар өргө диэри сылдьыаҕа.
Алина ПАВЛОВА, Күннэй ЭВЕРСТОВА, X кылаас, «Тумус кыһа» медиа киин,
С.К. Макаров аатынан Чурапчы гимназията