Ньурба улууһун Күндээдэ нэһилиэгэр анал байыаннай дьайыы Геройдарын кэриэстээн, оскуола оҕолоругар анаан аһаҕас патриотическай ырыа күрэҕэ буолан ааста. Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Күндээдэ нэһилиэгэр Төрөөбүт дойдуга бэриниилээх буолуу сылларын чэрчитинэн, анал байыаннай дьайыы кыттыылаахтарын «Орден мужества» кавалера Артем Николаевич Седяков уонна байыаннай дьайыы бэтэрээнэ Александр Будимирович Аммосов сырдык ааттарыгар ананна.
Күрэҕи «Күндээдэ нэһилиэгэ» тыа сирин түөлбэтэ, С.Н. Эверстова аатынан «Туску» норуот айар дьиэтэ, С.Г. Хардарысов аатынан Күндээдэ орто оскуолата, РФ үөрэҕириитин уонна иитиитин бочуоттаах үлэһитэ, СӨ үөрэҕириитин туйгуна Полина Васильевна Иванова, Антонина Николаевна Аммосова тэрийдилэр. Ньурбаттан 3 №-дээх оскуола, Ньурбатааҕы Степан Васильев аатынан араас хайысхалаах гимназия, А.Н. Чусовской аатынан техническэй лицей, Дьаархантан В.И. Иванов аатынан оскуола, С.Г. Хардарысов аатынан Күндээдэ орто оскуолатын үөрэнээччилэрэ, Ньурба «Светлячок», «Кэскил», «Туллукчаан», Күндээдэттэн «Кэнчээри» уһуйаан иитиллээччилэрэ кэлэн, уопсайа 80-тан тахса кыттааччы буолла.
Күндээдэ нэһилиэгин баһылыгын солбуйааччыта Мария Тагировна Григорьева ырыа күрэҕин аһыллыытыгар оҕолору эҕэрдэлээтэ уонна Александр Будимирович ийэтигэр Альбина Афанасьевна Аммосова-Күндээдинскэйэҕэ долгутуулаах быһыыга-майгыга «Күндээдэ бочуоттаах олохтооҕо» бэлиэни туттарда. Күрэх дьүүллүүр сүбэтинэн баянист, ырыаһыт Николай Пантелеймонович Ананьев, Ньурбатааҕы култуура уонна ыччат бэлиитикэтин департаменын сүрүн специалиһа Күннэй Дьулустановна Иванова, Александр Аммосов эдьиийэ, Дьокуускай куорат 13 №-дээх «Светлячок» уһуйаан иитээччитэ, РФ үөрэҕириитин Бочуоттаах үлэһитэ, бочуоттаах наставник Сардана Федоровна Охлопкова үлэлээтибит.
Күрэх сүрүн сыалынан патриотическай уонна байыаннай тиэмэлээх ырыа нөҥүө оҕолорго төрөөбүт дойдуга тапталы иитии, анал байыаннай дьайыы кыттыылаахтарын Артем Николаевич Седяков, Александр Будимирович Аммосов хорсун быһыыларын туһунан үүнэр ыччакка өйдөбүлү иҥэрии, сырдык ааттарын үйэтитии буолар.
Күрэх устата элбэх патриотическай ырыалар ылланнылар. Онон мустубут дьону долгуппут ырыалар бу биһиги геройдарбытыгар анаабыт тыыннаах махталбыт буолла. Күрэс кэмигэр биһиги буойун оҕолорбут хорсун быһыыларын, дойдуга бэриниилээх буолууларын туһунан презентация көстө турда.
Күрэх түмүгүнэн дьүүллүүр сүбэ быһаарбытынан Күндээдэ орто оскуолатын 2-с кылааһын үөрэнээччилэрэ «Саха тыына» уонна «Наша армия» ырыаларынан күрэх кылаан кыайыылааҕынан буоллулар, салайааччы П. В. Иванова. Хас биирдии категория аайы оскуола уорэнээччилэрэ, уhуйаан иитиллээччилэрэ бириистээх миэстэҕэ тигистилэр.
Номинация хаһаайыннарынан «Кыайыыга дьулуһуу» Айдын Васильев, Алина Герасимова, Күндээдэ оскуолатын 10-с кылаас үөрэнээччилэрэ, салайааччы Осипова Н. С.; «Көрөөччү биhирэбилэ» Күндээдэ орто оскуолатын 5-с кылаас үөрэнээччилэрэ, салайааччы Александрова А. А.;
«Көхтөөх кылаас» 3-с оскуола, салайааччы Винокурова И.А.; «Чуопчаарар чыычаахтар» «Кэнчээри» уһуйаан кырачааннара, салайааччы Саввинова А.Н.; «Кырачаан кыттааччы» Секова Виктория, «Кэнчээри» уһуйаан иитиллээччитэ, салайааччы Саввинова А.Н. ааттаннылар.
Бары кыттааччылар бириистээх миэстэҕэ тиксэннэр илии тутуурдаах, өттүк харалаах, харчынан бириэмийэлээх тарҕастылар.
– Күндү кыттааччылары, көрөөччүлэри, анал сыаналааччылары барыгытын бу умнуллубат түгэнинэн ис сүрэхтэн тахсар сылаас санаабынан, сүүрбүт-көппүт, кыһалҕа гынан тэрийсибит үтүө дьоммор махталым муҥура суох. «Ырыа – олох аргыһа, ырыа – санаа ситимэ, ырыа – арахсыспат аргыспыт» — диэн туран кэрэ киэһэбитин киэргэппит кырачаан чуораанчыктарбытыгар, чуопчаарыйар чыычаахтарбытыгар этэҥҥэ буолууну, табыллыыны баҕарабыт, тус олоххутугар дьолу, үөрэххитигэр ситиһиини, – Александр Аммосов ийэтэ Альбина Афанасьевна Аммосова-Күндээдинскэйэ үтүө санаатын эттэ.
«Дьоруойдар өлбөттөр. Кинилэр биһиги сүрэхпитигэр үйэлэргэ букатыннаахтык хаалаллар» диэн норуот мээнэҕэ эппэт. Биһиги уолаттарбыт, анал байыаннай дьайыы кыттыылаахтара Седяков Артем Николаевич Седяков уонна Александр Будимирович Аммосов дьиҥнээх патриоттар, кинилэр ааттара хаһан да умнуллубат. Сырдык кэриэстэрэ үйэлэргэ чэчирээтин!
Бу тэрээһини тэрийиигэ күүс-көмө буолбут уолаттарбыт Артемнаах Александр бииргэ үөрэммит табаарыстарыгар, аймахтарыгар уонна биир дойдулаахтарбытыгар күрэҕи тэрийбит бөлөх аатыттан дириҥ махталбытын тиэрдэбит.
Сардана ОХЛОПКОВА, Дьокуускайдааҕы 13 №-дээх «Светлячок»
уһуйаан иитээччитэ, РФ бочуоттаах үлэһитэ, наставник