Мин Мүрү 2 №-дээх орто оскуолатын III “А” кылааһын туйгун үөрэнээччитэбин. Биһиги кылааһынан куруук үтүө санаа аахсыйаларыгар көхтөөхтүк кыттабыт. Бүгүн эһиэхэ үгэс буолбут “Өйдүүбүт, сүгүрүйэбит, махтанабыт” диэн аахсыйа-бырааһынньыкпыт туһунан кэпсиэхпин баҕарабын.
Сыл аайы ыам ыйын 9 күнүн, Кыайыы күнүн көрсө эбэлэрбитин, эһэлэрбитин, хос эбэлэрбитин уонна хос эһэлэрбитин, сэрии сылын оҕолорун, тыыл бэтэрээннэрин эҕэрдэлиибит. Быйыл биһиэхэ кылаас чааһыгар Тима Тимофеев хос эбэтэ Валентина Николаевна Кириллова, мин эбэм Матрена Семёновна, эһэм Николай Васильевич Москвитиннар, Уля Румянцева эбэтэ Мария Тимофеевна Бурцева, Дайаана Федотова эбэтэ Евдокия Ивановна Федотова кэлбиттэрэ. Кинилэр оҕо саастара Аҕа дойду Улуу сэриитин кэмигэр ааспыт. Сэрии саҕанааҕы ыарахан оҕо саастарын кэпсээбиттэриттэн элбэҕи биллибит. Эбэлэрбитигэр, эһэлэрбитигэр махталбыт, сүгүрүйүүбүт бэлиэтигэр ас наборун бэлэхтээтибит. Хоһоон аахтыбыт, ырыа ыллаатыбыт.
Кэнсиэрбитин Айсиэн Аянитов, Айнаара Данилова ыыттылар. Саша Попов хоһоон аахта, мин баяҥҥа “Катюшаны” оонньоон таһаардым. Адриан Афанасьев бэтэрээннэр тустарынан ырыаны ыллаата. Сыл бастыҥ ансаамбыла буолбут «Өрөгөй” уолаттара Кыайыы күнүгэр аналлаах ырыаны ыллаатыбыт. Олус долгутуулаах этэ!
Коля Черемкин хос эбэтигэр Розалия Константиновна Сидороваҕа, Айнаара Данилова хос эбэтигэр Варвара Михайловна Даниловаҕа, Нина Сухоцкая хос эһэтигэр Иван Николаевич Охлопковка сиэттэрэ биһиги оҥорбут бэлэхтэрбитин уонна эҕэрдэ аккырыыккаларбытын илдьэн туттардылар.
Мин маннык үтүө дьыаланы оҥорорбутуттан олус үөрэбин! Учууталбыт Алена Алексеевна Лонгинова биһигини үтүө санаалаах, аһыныгас сүрэхтээх, болҕомтолоох буоларга үөрэтэриттэн улахан махталбын тиэрдэбин.
Сема Москвитин, Мүрү 2 №-дээх оскуолатын III “А” кылааһын үөрэнээччитэ,
Уус Алдан.
Кэскил14.ру