Саха Өрөспүүбүлүкэтин күнүгэр Ярославль куораттан үөрүүлээх сонуну туттубут. Таатта улууһун И.Н. Гуляев аатынан Туора Күөл орто оскуолатын 9-с кылааһын үөрэнээччитэ Дарина Максимова улахан ситиһиилэннэ. Кини Ярославль куоракка ыытыллыбыт «Открытие» Арассыыйатааҕы XXIX научнай конференцияҕа «История» секциятыгар 43 оҕо кыттыбытыттан кыайыылаах үрдүк аатын ылла, 1 степеннээх дипломунан, мэтээлинэн наҕараадаланна.
Дарина чинчийэр үлэнэн оҕо эрдэҕиттэн дьарыктанар. Онуоха оскуолаҕа үөрэтэр учууталлара, салайааччыта Лилианна Эрнстовна Егорова, ийэтэ Варвара Николаевна Максимова күүс-көмө, сүбэ-ама буолаллар.
Дарина «Кэскил» оҕо бэчээтин кыһата 2025 сыл күһүнүгэр «Энергетик» лааҕырга ыыппыт «Төрүччү» сменатыгар 21 хонук устата дьарыктанан, салгыы «Төрүччү» научнай-практическай конференцияҕа ситиһиилээхтик кыттыбыта уонна ХХХ төгүлүн ыытыллар В.П. Ларионов аатынан «Инникигэ Хардыы» өрөспүүбүлүкэтээҕи научнай-практическай конференцияҕа кыттар быраабы ылбыта.
Бу улахан түһүлгэҕэ Дарина Максимова үлэтэ үрдүктүк сыаналаммыта – 1 степеннээх дипломунан бэлиэтэммитэ, 9-11 кылаас үөрэнээччилэригэр аналлаах «Открытие» Арассыыйатааҕы научнай конференцияҕа кыттарга мэктиэлэммитэ. Манна бастаан кэтэхтэн талыы түһүмэҕин ситиһиилээхтик ааспыта. Бу түһүмэххэ элбэх үлэ ирдэбилгэ сөп түбэспэккэ сыыйыллыбыт. Дарина үлэтэ улахан сиидэни ааһан, Ярославль куоракка ыытыллыбыт конференцияҕа ыҥырыы тутан, онно тиийэн икки күн устата кытынна.
– Арассыыйа 30-ча регионуттан 200-кэ оҕо кыттыыны ылбыт, ол иһигэр Саха сириттэн 9 оҕо. Дарина «История» секциятыгар «Два солдата: унаследованный путь» диэн үлэтин көмүскээтэ. Түгэх өбүгэтэ ыраахтааҕы саллаата Максимтан саҕаланан хос-хос эһэтигэр Максимов Дмитрий Алексеевичка тиийэн, онтон салҕыы 21-с үйэ буойуна, Арассыыйа Дьоруойа Максимов Родимир Дмитриевич геройдуу суолун научнай чинчийиигэ олоҕуран үөрэттэ. Бу секцияҕа 43 эдэр чинчийээччи кыттыыны ылбытын учуонай-экспертэр сыаналаатылар. Кинилэр научнай үлэ бары ирдэбилгэ сөп түбэһэрин, тиэмэ кэрэхсэбиллээҕин бэлиэтээтилэр. Дарина үлэтин чаҕылхайдык көмүскээтэ, бары ыйытыыларга лоп бааччы хоруйдаата. Конференция түмүгүнэн муҥутуур кыайыылаах аатын ылла. Түгэнинэн туһанан, «Кэскил» оҕо бэчээтин кыһатыгар махтаныахпытын баҕарабыт. Кинилэр ыытар «Төрүччү» бырайыактарыгар кыттаммыт, чинчийэр үлэбитигэр сүрдээх элбэҕи туһанныбыт. «Кэскиллэр» ыйан-кэрдэн, Национальнай архыып үлэһиттэрин кытта сибээстээн, тиэмэбит аатын чочуйан, хайысхатын, ис хоһоонун чопчулаан биэрбиттэрэ. Саамай үчүгэйэ диэн «Кэскиллэр» «Төрүччү» бырайыакка кыттар оҕолорун «Инникигэ Хардыы» конференцияҕа таһааран, саҕаланыаҕыттан бүтүөр диэри арыаллаан илдьэ сылдьаллар, куруук сүбэ-ама буолаллар, көмөлөһөллөр. Үөрэнээччибин Даринаны, ийэтин, чугас дьоннорун улахан ситиһиинэн өссө төгүл эҕэрдэлиибин, – диэн кэскил14.ру саайка анаан Дарина Максимова салайааччыта Лилианна Эрнстовна Егорова кэпсээтэ.
кэскил14.ру