От ыйын 8 күнүттэн саҕалаан 21-гэр диэри Дьокуускай куоракка «Энергетик» лааҕыр баазатыгар «ВОИН» киинин лааҕыра буолан ааста. Бу лааҕыр «Эдэр геройдар бириэмэлэрэ» диэн ааттанан номнуо иккис смената этэ. Эдэр көлүөнэ патриоттуу санаата күүһүрэн, дойдутугар дурда-хахха буолар санаата үөскүүрүн туһугар үлэлиир.
Мин бэйэм баҕа өттүбүнэн оскуолабыттан соҕотоҕун бу лааҕырга сырыттым. Манна барыта 10 этэрээккэ Сахабыт сирин араас муннуктарыттан 500-чэкэ оҕо сырытта. Лааҕырга сылдьыбыт оҕолор эт-хаан өттүнэн үчүгэй бэлэмнээхтэр, кыахтаахтар. Күн аайы бэрээдэк быһыытынан үөрэхтэр, лекциялар, спортивнай күрэхтэһиилэр буоллулар. Мин киэһэ аайы волейбол оонньоотум, саҥа дьүөгэлэрдэнэн үөрдүм-көттүм. Бэйэм ытыыны сөбүлүүр буолан «лазертаг» ытыалаһыыга үчүгэйдик оонньоотум. «Время Калашникова» диэн автоматы ыһыы-хомуйуу күрэхтэһиитигэр кыргыттарга 2 миэстэ буолан ситиһиилэнним.
«ВОИН» киин лааҕыра эдэр ыччаты, оҕолору байыаннай-прикладной билиилэргэ үөрэтэр, дисциплинаны үөскэтэр уонна дойдубутугар бэриниилээх буоларга иитэр. Ону таһынан «ВОИН» киинигэр сылдьыбыт оҕолорго байыаннай үрдүк үөрэх кыһатыгар киирэллэригэр ЕГЭ-лэригэр 2-5 баллга диэри эбии балл бэриллэр. Ол курдук 2025 сыллаах «ВОИН» киинин 30 курсааннара эбии баалларын туһаммыттар.
«ВОИН» киин лааҕыра эдэр көлүөнэ бары өттүнэн тупсан, чочуллан тахсан дьиҥнээх Патриот, Гражданин буола улаатарыгар тирэх буолар.
Эвелина ЖДАНОВА, Н.И. Кочнев аатынан Хаҥалас орто оскуолатын 10 кылааһын үөрэнээччитэ.
Кэскил14.ру