М.К. Аммосов аатынан Хотугулуу-Илиҥҥи федеральнай университет Мединститут Анатомия кафедрата «Анатомическай оскуола» диэн бырайыагы тыа сирин оскуолаларыттан аан бастакынан Эмис, Алтан, Сатаҕай оскуолаларын хабан үлэлэттэ.
Нэһилиэнньэ ортотугар чөл олоҕу көҕүлүүр, быраас идэтин баһылыан баҕалаах оҕолору түмэр тэрээһин «Кэскил» оҕо бэчээтин кыһатын, Амма улууһун Эмис нэһилиэгин баһылыга П.П. Бубякин өйөбүлүнэн олоххо киирдэ.
5-11 кылаас үөрэнээччилэрэ, төрөппүттэр, учууталлар үс бөлөҕүнэн арахсан үс лаборатория үлэтигэр кыттыыны ыллылар.
«Баҕа санаабар бастакы хардыыларым» диэн ааттаах лабораторияҕа быраас идэтин баһылыырга эрдэттэн бэлэмнэнэр ханнык кыахтар баалларын медицинскэй наука кандидата, доцент С.Н. Леханова, анатомия кафедратын старшай преподавателя М.Н. Маркова сиһилии кэпсээтилэр.
«Мин доруобуйам — мин бэйэм илиибэр» диэн медицинскэй наукатын кандидата, доцент Е.П. Сергина салайан үлэлэппит лабораторията кыттааччылар болҕомтолорун тарта. Екатерина Петровна чөл олох, чэгиэн турук, чэбдик өй-санаа киһи уорганнарын, этин-сиинин кытта быһаччы сибээһин туһунан чопчу көрдөрөр матырыйаалларга олоҕуран кэпсээтэ. Оҕолор бу күн доруобуйа туһунан үгүс интэриэһиргиир ыйытыыларыгар хоруйдары ыллылар.
«Мин төрдүм-ууһум» диэн лабораторияҕа төрөөбүт тиэргэнтэн олорон төрдү-ууһу анааран көрүү кыахтарын туһунан «Кэскил» оҕо хаһыатын эппиэттиир сэкирэтээрэ В.П. Петрова кэпсээтэ.
Анатомия кафедратын коллектива Эмис, Алтан, Сатаҕай нэһилиэктэрин участковай бырааһыгар К.М. Михайловаҕа Мединститут директорын аатыттан Махтал суругу туттардылар. Кинилэр выпускниктара тыа сиригэр тахсан ситиһиилээхтик үлэлии сылдьарын ойуччу тутан бэлиэтээтилэр.
Эмис оскуолатыгар киһи этин-сиинин, уорганнарын туһунан ыытыллыбыт квест-викторинаҕа 10 кылаас коллектива кыайыылаах аатын ылан, Анатомическай музейга босхо сылдьарга ыҥырыыны туттулар. Бастыҥ кылаастары наҕараадалыырга Алтан, Сатаҕай оскуолаларыгар эмиэ маннык ыҥырыылары туттардылар.
Үс нэһилиэккэ быраас идэтин баһылаабыт оҕолор аҕыйаҕа суохтар. Алтан оскуолатыттан биир кылаастан икки оҕо тэҥинэн медик идэтигэр киирбит түгэннэрэ эмиэ баар. Оттон Эмис оскуолатын директора Г.Д. Захаров билиһиннэрбитинэн, 2000 сылтан бэртэх Эмис орто оскуолатын араас сылларга үөрэнэн бүтэрбит 19 оҕо быраас, сиэстэрэ идэтин баһылаан, өрөспүүбүлүкэ араас муннуктарыгар үлэлии сылдьаллар.
Анатомия кафедратын доценнара үс нэһилиэк оскуолалара медицина өттүгэр улахан кыахтаахтарын бэлиэтээтилэр. Ону өссө сайыннаралларыгар, быраас идэтин баһылыыр баҕалаах оҕолору кытта ситимнээх үлэни салгыылларыгар баҕардылар.
«Академическай оскуола» үлэтин түмүгүн суоһа, сылааһа сойо илигинэ Эмис, Алтан, Сатаҕай оскуолаларын директордара Гаврил Дмитриевич Захаров, Александр Егорович Шишигин, Иванна Ивановна Шишигина, Сатаҕай оскуолатын химия учуутала Лия Владимировна Андреева Дьокуускайга Анатомия кафедратын салалтатын, Аччыгый медицинскэй академия директорын Ирина Шамильевна Малогулованы, «Кэскил» оҕо бэчээтин кыһатын директора Ольга Ивановна Семенованы кытта көрүстүлэр.
Анатомия кафедратын сэбиэдиссэйэ, профессор, медицинскэй наука доктора, СӨ Духуобунаһын академиятын академига, Чөл олох Аан дойдутааҕы академиятын вице-президенэ Карл Георгиевич Башарин чөл туруктаах, бигэ тирэхтээх, дойдутун таптыыр ыччаты иитиигэ тыа сирин оскуолаларын салайааччыларын кытта санаатын үллэһиннэ. Ааҕар, эргиччи билиилээх, киэҥ өйдөөх-санаалаах оҕолор мединститукка кэлэллэрин туһугар үлэ оскуолаттан саҕалаан барыахтааҕын тоһоҕолоон бэлиэтээтэ.
«Кэскил» оҕо бэчээтин кыһатын директора Ольга Ивановна Семенова оҕо хаһыаттарыгар, сурунаалларыгар доруобуйа, эт-сиин тиэмэтин сырдатыы хайысхаларын туһунан билиһиннэрдэ. «Анатомическай оскуола» үлэтин тыа сирин оскуолаларыгар аан бастакытын олоххо киллэрсибит үс оскуола салалтата оҕо бэчээтин таһаарыыларыгар сурутууну кыайа туталларыгар эрэнэрин биллэрдэ.
Мединститут иһинэн үлэлиир Аччыгый медицинскэй академия директора Ирина Шамильевна Малогулова тыа сирин оскуолаларын кытта бииргэ үлэлээһиҥҥэ ханнык кыахтар баалларын туһунан сиһилии билиһиннэрдэ, Оҕолорго, төрөппүттэргэ анаан кинигэ бэлэхтээтэ. Үс оскуола директордара Аччыгый медицинскэй академияны кытта инникитин бииргэ үлэлэлэһэр санаалаах төнүннүлэр.
Оҕо идэтин сөпкө таларыгар, киһи буолан үүнэн-үрдээн тахсарыгар сүрүн тосхоллору биэрэр, сырдатар «Анатомическай оскуола» үс нэһилиэги хабан ыыппыт үлэтин бастакы үктэлэ үтүө түмүктэрдээх буоллун!
Сиһилии манна көр:
Сардаана МАТВЕЕВА.
#кэскиллээхолоххобэлэмбуол