Оскуолабытыгар сылын аайы ыытыллар “Зарница-2026” байыаннай-спортивнай оонньуу буолан ааста. Быйылгы «Зарница» Аҕа Дойду Улуу сэриитин I степеннээх уонна Үлэ Кыһыл Знамята уордьаннар кавалера, Байаҕанатай нэһилиэгин, Уус Алдан улууһун бочуоттаах олохтооҕо Михаил Николаевич Охлопков төрөөбүтэ 105 сылыгар ананна.
Күрэххэ 1-10 кылаас үөрэнээччилэрэ икки хамаандаҕа «Чолбон» (хамандыыр Громов Михаил, X кылаас), «Дохсун» (хамандыыр Петров Баатыр, IX кылаас) арахсан 17 көрүҥҥэ күрэхтэстибит.
Күрэх үөрүүлээх арыллыытыгар Михаил Николаевич оҕолоро, сиэннэрэ кыттыыны ыллылар. Бастакы күн ырыаны уонна хаамыыны көрүү, Калашников автоматын ыһыы, хомуйуу, Калашников автоматын буулдьатын хомуйуу, Михаил Николаевич олоҕун, үлэтин, бойобуой суолун туһунан тиэмэҕэ политбой, кашевардар күрэхтэһиилэрэ, музыкальнай нүөмэрдэр куонкурустара, байыаннай-спортивнай күрэхтэһии, ОФП, футбол, волейбол, хомуур хапсаҕай буолла. Бастакы күҥҥэ олус элбэх көрүҥҥэ кыттан, 5-10 кылаас үөрэнээччилэрэ оскуолаҕа хонон, түүҥҥү тревогаҕа туран, кыратык да буоллар, саллаат олоҕун биллибит.
Күрэхпит иккис күнүн түһүмэхтэрэ култуура уонна сынньалаҥ пааркатыгар ыытылынна: байыаннай эстафета (рюкзагы бэрэбиэркэлээһин, мэһэйдээх балаһалар), гранатометчиктар, снайпердар, сигналщиктар күрэхтэрэ, ориентирование, эпилиэт былдьаһыы.
Икки күннээх тыҥааһыннаах “Зарница” түмүгүнэн «Дохсун» хамаанда бастакы миэстэ буолла уонна көһө сылдьар кубогынан наҕараадаланна. «Чолбон» хамаанда иккис миэстэ буолары ситистэ. Маны таһынан көрүҥ аайы үчүгэй көрдөрүүлээх оҕолор анал ааттарынан наҕараадаланнылар: “Бастыҥ строевик” – Аммосов Саян (VII кылаас), «Калашников автоматын ыһыыга уонна хомуйууга бастыҥ көрдөрүүлээх» – Готовцева Айыллаана (IX кылаас), Эверстов Сайаан (X кылаас), «Калашников автоматын маҕаһыынын буулдьатын хомуйууга бастыҥ көрдөрүүлээх» – Мамонтова Туйаара, Громов Миша (X кылаас), «Бастыҥ историк» – Готовцев Демит (V кылаас үө), «Бастыҥ медик» – Неустроева Камила (VIII кылаас), Аргунова Милена (X кылаас), «ОФП-га бастыҥ» – Готовцев Демит, Готовцева Аделина (V кылаас ), «Бастыҥ бомбардир» – Свинобоев Даниил (X кылаас), волейболга «Бастыҥ оонньооччу» – Сивцева Эльмира (IX кылаас), «Бастыҥ гранатометчик» – Мордовская Алена, Эверстов Сайаан (X кылаас). «Бастыҥ сыал ытааччы» – Готовцев Вася, Саввина Ангела (VII кылаас), “Бастыҥ сигнальщик” – Тимофеева Амелия (VI кылаас), Прибылых Эльза (X кылаас).
М.Н. Охлопков аатынан икки күннээх “Зарница-2026” байыаннай-спортивнай оонньуу умнуллубаттык ааста.
Валерия ГОТОВЦЕВА, XI кылаас,
М.Н. Готовцев аатынан Танда орто оскуолата, Уус Алдан
Ааптар хаартыскалара