Ыам ыйын 15 күнүгэр Дьааҥы улууһун Боронук орто оскуолатыгар Дьиэ кэргэн күнүгэр анаммыт улахан тэрээһин буолла. Бу күнү биһиги, Дьиэ кэргэн күнүн таһынан, тапталлаах «Кэскил» хаһыаппыт төрөөбүт күнүн эмиэ бэлиэтээтибит. Бу икки улахан суолталаах бырааһынньыгы холбоон, биир кэлим тэрээһин оҥордубут.
Дьиэ кэргэн хас биирдии киһиэхэ күндү. Ол иһин бу тэрээһиҥҥэ дьиэ кэргэттэр кэлэннэр күрэхтэстилэр, оонньоотулар.
Хас биирдии киһи кыра эрдэҕинэ «Кэскил» хаһыаты кытта доҕордоспута чуолкай. Онон «Кэскил» хаһыакка анаан фотозона оҥордубут. «Кэскил» хаһыат көлүөнэлэри утумнуур эйгэлээх диэтэххэ сыыспатым буолуо. «Кэскил» уонна дьиэ кэргэн бэйэ-бэйэлэрин кытта олус ситимнээхтэр.

Ол курдук, бу күҥҥэ оҕолор «Дьиэ кэргэним утум мала» («Реликвия моей семьи») диэн быыстапкаҕа дьиэ кэргэннэрин уһулуччулаах малларын аҕаллылар уонна кэпсээтилэр. Ону таһынан, оҕолор истэригэр «Ыра санаа альбома» диэн араас эргэ сурунааллартан ыра санааларын олоххо киллэрэр ойуулары кырыйан коллаж оҥорор айар мастарыскыай үлэлээтэ. Онно оҕолор бэйэлэрин дьиэ кэргэннэригэр сыһыаннаах хартыыналары айан таһаардылар.








Дьиэ кэргэн икки ардыларыгар 14 хамаанда дуобат кыттыылаах күрэҕэ буолбута. Оҕолорбут ийэлэрэ-аҕалара, эбэлэрэ-эһэлэрэ кэлэн кыттыбыттара ордук киэргэттэ. Улахаттарга кыайыылааҕынан сэрии оҕото, 82 саастаах хос эбэ Варвара Иннокентьевна Горохова уонна кини сиэнэ 10 кылаас үөрэнээччитэ Горохов Данил буоллулар. Алын кылаастарга 4 кылаас үөрэнээччитэ Ай-куо уонна ийэтэ Валентина Сыромятниковалар бастаатылар.

Бу күн саамай сүрүн, сүүрүүлээх-көтүүлээх күрэҕинэн эстафета буолбута. Манна 11 дьиэ кэргэн күрэхтэспитэ. Кыайыылаах Заборовскайдар дьиэ кэргэн буолбута. Иккискэ Другиттар, үһүскэ Сыромятниковтар таҕыстылар. Бүгүҥҥү күн дьиэ кэргэн ситимэ бөҕөргүүрүгэр, болҕомтолоох, кыһамньылаах, өй-санаа, чэгиэн буолуу сиэрэ-майгыта дириҥииригэр төһүү буоларыгар саарбахтаабаппын.
Маннык тэрээһиннэр ыаллары сомоҕолуур уонна түмэр сүдү суолталаахтар. Бу умнуллубат күнү иилээн-саҕалаан тэрийбит учууталларбытыгар махталбытын тиэрдэбит.
Оксана Аммосова, Боронук орто оскуолатын 11 кылааһын үөрэнээччитэ, Үөһээ Дьааҥы.
keskil14.ru