Ыам ыйын 19 күнүгэр Тааттаҕа оскуола үөрэнээччилэригэр Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи уонна Улуу Кыайыы 80 сылыгар аналлаах улуустааҕы «Үрдэл» күрэҕэ буолан ааста.
Улуус оскуолаларыттан оҕо тэрилтэлэрэ көхтөөх кыттыыны ыллылар, ол курдук Туора-Күөлтэн «Уолан», Уолбаттан “Мээчиктэр”, Дьохсоҕонтон «Кэскил», Игидэйтэн «Сайдам им. Нажима Нестерова», Ытык-Күөл иккис нүөмэрдээх орто оскуолатыттан “Албан” хамаандалара күрэхтэстилэр.
Хамаандалар 10 араас күрэх хайысхаларын аастылар: хамаанданы билиһиннэрии, комбинированнай эстафета, строевой хаамыы, строевой ырыа, автоматы ыһыы, хомуйуу, баһаартан сэрэхтээх буолуу эстафетата, «Экология окружающей среды», «Меткий стрелок», «Безопасная дорога», «Первая помощь при поражении электрическим током», спасатель-пожарнайдар эстафеталара. Күрэхтэри куруутун бииргэ үлэлэһэр партнердарбыт тэрийэн ыыттылар. Кыайбыт хамаандалары, ситиһиилэммит оҕолору бэйэлэрэ тэрилтэлэрин ааттарттан наҕараадалаатылар.
Күрэхтэр уопсай түмүктэринэн улуустааҕы “Үрдэл” оонньуу кыайыылаахтарынан: бастакы миэстэ Туора-Күөл орто оскуолатын «Уолан» хамаандата, иккис миэстэ Ытык-Күөл иккис нүөмэрдээх орто оскуолатыттан “Албан” хамаандата, уһус миэстэ Уолба орто оскуолатын “Мээчиктэр” хамаандата буоллулар.
“Үрдэл” оонньуу олус тэтимнээхтик, интэриэһинэйдик, түмсүүлээхтик ааста. Бары кыттыбыт оҕолорго, салайааччыларга махтанабыт. Сылын ахсын көмө буолар партнердарбытыгар: Тааттатааҕы үөрэҕирии салалтата, ОГПС РС (Я) №32 по МР “Таттинский улус”, РЭС, ГАУ РС (Я) “Якутлесресурс”, Таттинский филиал “Лесничество”, Отделение МВД России по Таттинскому району, Отделение Госавтоинспекции ОМВД России по Таттинскому району, Таттинская улусная инспекция “Охрана природы”, Совет местного отделения “Движение Первых” улахан махталбытын этэбит.
Кэскилбит, кэнчээри ыччаппыт – оҕолорбут сайдалларыгар күүс-көмө буолан таһаарыылаах үлэбит үтүө түмүктээх буоллун, үгүс оҕону тарда турдун. Түмсүүлээх үлэбит оҕолорбут, улууспут сайдыытыгар төһүү күүс буола турдун!
Тааттатааҕы «Сатабыл» оҕо айымньытын дьиэтэ.
keskil14.ru