Бүлүү улууһун П.А. Павлов аатынан I Күүлэт орто оскуолатын киэн туттар выпускнига, Үүнэр көлүөнэ судаарыстыбаннай тыйаатырын уус-уран салайааччыта Алексей Прокопьевич Павлов төрөппүттэрин үтүө ааттарын үйэтитэн, 2001 сылтан оскуола бастыҥ выпускнигар аҕатын – Саха АССР оскуолаларын үтүөлээх учуутала Прокопий Алексеевич Павлов, онтон алын сүһүөх оскуоланы бүтэрээччигэ ийэтин – педагогическай үлэ, тыыл бэтэрээнэ Ирина Герасимовна Николаева ааттарынан стипендиялары олохтообутун туттарыы үтүө үгэскэ кубулуйда.
Прокопий Алексеевич Павлов — гвардия старшай лейтенана, Кыһыл Сулус, Аҕа дойду Улуу сэриитин I истиэпэннээх уордьаннар кавалердара, “Ленинград оборонатын иһин”, ”1941-1945 сс. Аҕа дойду сэриитигэр Германияны кыайыы иһин” мэтээллэрдээх, Верховнай Главнокомандующай Иосиф Сталинтан түөрт махтал суруктаах. Ленинградскай, I Прибалтийскай фроннарга буолбут кырыктаах кыргыһыыларга кыттан, Ленинградскай уобалаһы, Эстонияны, Латвияны босхолоспута. П.А.Павлов үтүө аатын үйэтитиигэ элбэх үлэ баран, нэһилиэк сэбиэтин депутаттарын сессиятын быһаарыытынан, 2017 сыллаахха үлэлээбит оскуолатыгар П.А.Павлов аата иҥэриллибитэ. Кини бойобуой эписиэр быһыытынан ыччаты патриотическай тыыҥҥа иитиигэ, төрөөбүт дойдуга бэриниилээх буолууга элбэх ыччаты угуйбута. Саха тылын уонна литературатын учуутала буолан, төрөөбүт тылы таптыырга, харыстыырга үөрэтэрэ.
Быйылгы үөрэх дьылын түмүгүнэн, П.А. Павлов аатынан стипендия үөрэх туйгуна, саха тылын олимпиадатын улуустааҕы, өрөспүүбүлүкэтээҕи түмүктүүр түһүмэҕин кыайыылааҕа уонна призера, оскуола, нэһилиэк иһинэн ыытыллар тэрээһиннэр көхтөөх кыттааччылара, Х кылаас үөрэнээччитэ Алена Кариуска ананна. Киниэхэ төрөөбүт тылын өрө тутан, үрдүктэн үрдүк чыпчааллары дабайан, сайдыы саҥа саҕахтарын арыйан иһэригэр ситиһиини баҕарабыт!
Ирина Герасимовна Николаева I Күүлэт оскуолатыгар алын кылаас учууталынан үтүө суобастаахтых үлэлээбитэ, үгүс кырачааннары ааҕарга-суруйарга үөрэппитэ. Быйылгы 2024-2025 үөрэх дьылын түмүгүнэн Ирина Герасимовна аатынан стипендия хаһаайкатынан IV кылаас үөрэнээччитэ Владислава Тутукарова буолла.
Влада маҥнайгы кылаастан туйгун үөрэхтээх, «Павловскай ааҕыылар» НПК кыайыылааҕа, уус-уран ааҕыыга өрөспүүбүлүкэтээҕи күрэхтэргэ анал бириис, I диплом хаһаайкалара, «Музыка для всех» бырайыак иһинэн ырыа күрэҕин, саха тылыгар И.И. Каратаев аатынан кэтэхтэн олимпиада кыттыылааҕа. Кинигэ ааҕарын олус сөбүлүүр, кылаас, оскуола, нэһилиэк тэрээһиннэрин ырыанан киэргэтэр. Ырыаҕа, үҥкүүгэ үгүс куонкурустар кыайыылаахтара.
Ону таһынан М.Н. Жирков аатынан Бүлүүтээҕи художественнай оскуола филиалын иитиллээччитэ. Влада алын кылааһын үрдүк көрдөрүүлээх бүтэрэн, оскуола орто сүһүөҕэр үктэммитинэн эҕэрдэлиибит уонна өссө да элбэх ситиһиини, сайдыыны, билиини баҕарабыт!
Оскуола үөрэнээччилэрин аатыттан биир дойдулаахпытыгар Алексей Прокопьевич Павловка махтанан туран, быйылгы стипендиаттарга өссө да үрдүк ситиһиилэри баҕарабыт.
Туяра Бубякина, Уруйдаана Федорова,
I Күүлэт орто оскуолатын
медиа киинин чилиэннэрэ, Бүлүү улууһа.