1922 сыллаахха ыам ыйын 19 күнүгэр Владимир Ильич Ленин аатын сүгэр Пионерскай тэрилтэ төрүттэммитэ 103 сылын уонна оскуолабытыгар Павел Морозов аатынан Дружина төрүттэммитэ 93 сылын көрсө бэрт сэргэх тэрээһин буолан ааста.
Пионерскай тэрилтэ диэн оҕону түмэр, үлэҕэ көҕүлүүр, сиэр-майгы өттүнэн иитэр, дойду иннигэр бэриниилээх буоларга иитэр суолталаах тэрилтэ. Ол курдук, биһиги оскуолабытыгар номнуо 93 сыл анараа өттүгэр пионерия диэн оҕо түмсүүтэ тэриллэн, күн бүгүҥҥэ диэри үлэлии хамсыы сылдьар.
Халлааммыт ардахтаах күннэрэ буолан, айылҕабытыгар, таптаан сылдьар Маҥхааһайбыт алааһыгар кыайан тахсыбатыбыт. Ол да буоллар, оскуолабыт спортивнай саалатыгар үөрэ-көтө көрүстүбүт. Тэрээһиҥҥэ бэтэрээн пионердар, комсомуоллар күндү ыалдьыт буолан кэлэн, истиҥ эҕэрдэлэрин тиэртилэр. Ол курдук, нэһилиэк дьаһалтатын социальнай боппуруоска баһылыгы солбуйааччы Тамара Прокопьевна Давыдова пионер хайдах хаачыстыбалааҕын туһунан кылгастык билиһиннэрдэ уонна эҕэрдэ тылы эттэ.
Үөрүүлээх быһыыга-майгыга Пионер уонна Эдэр армеец үрдүк аатын сүгэр этэрээтигэр саҥа киирбит V кылаас үөрэнээччилэрин чиэстээтилэр. Пионерия өрөгөй ырыатыгар кыһыл хаалтыс баайдылар. Хас биирдии оҕо чиэһинэй, кырдьыксыт, дойдутун уонна норуотун иннигэр бэриниилээх буоларын туһунан андаҕар тыл эттэ, эрэннэрдэ. Онтон «Эдэр армеец» буолбуттарын бигэргэтэр дастабырыанньалары Амма улууһун дириэктэрдэрин муниципальнай сүбэһиттэрин куратордара Майя Капитоновна Карманова туттарда.
Салгыы үгэс быһыытынан, орто сүһүөх юнармеецтар хаамыылара буолла. Манна хас биирдии кылаас үөрэппит ырыаларын ыллаатылар, кэккэлии хаамтылар уонна рапорт туттардылар.
Бу үөрүүлээх тэрээһин кэнниттэн физкультура учууталлара Күннэй Давыдовна Чирикова уонна Семен Васильевич Ефимов сүүрүүлээх-көтүүлээх квест оонньууну ыыттылар. Уопсайа 4 хамаандаҕа арахсан, 6 тохтобулларынан сорудахтары толордулар. Бары билэрбит курдук, оонньуубут Улуу Кыайыы 80 үбүлүөйдээх сылыгар ананна. Манна, сэрии сылларын ырыаларын ыллаатылар, Герой куораттар ойууларын пазл оҥорон таһаардылар, бааһырбыт буойуну быыһаатылар, араас мэһэйдэри туораатылар, скакалканан ыстаннылар уонна байыаннай эстафетаҕа куоталастылар. Түмүккэ, көхтөөхтүк кыттыбыт хамаандалар бириэмэҕэ элбэх бөҕү хомуйууга күрэхтэстилэр. Хаартысканан, видеонан отчуоттаатылар.
Сэргэх тэрээһини VIII кылаас үөрэнээччилэрэ Айдын Иванов, Нарыйа Иванова уонна Сайнаара Яковлева иилээ-саҕалаан ыыттылар. «Эрэл» оҕо хамсааһынын салайааччыта, дириэктэр сүбэһитэ Вилена Мартынова бырааһынньыгы тэрийэн салайда, ыытта.
Кэлбит оҕолор бары астыннылар, сэмэй бэлэхтэри туттулар.
Латифа Маркова, «Платформа» медиа киин чилиэнэ,
Бөтүҥ, Амма.
keskil14.ru