Ньурба улууһун Н.И. Прокопьев аатынан Хатыы орто оскуолатыгар оҕо ааҕыытын көҕүлүүр соруктаах «Оскуоланан «Кэскиллиин!» диэн акция биллэрдилэр. Уонна бүгүн үөрэнээччилэр «Кэскил» хаһыакка, «Чуораанчык», «Юность Севера» сурунаалларга суруттардылар.
«Оскуоланан «Кэскиллиин!» акция 1-11 кылаас үөрэнээччилэрин иһигэр ыытыллар. Үтүө хамсааһыны төрөппүттэр эмиэ үөрэ-көтө өйөөтүлэр.
Алена Иванова, иитэр үлэҕэ директоры солбуйааччы:
— Н.И. Прокопьев аатынан Хатыы орто оскуолатыгар «Интернетэ суох күн» чэрчитинэн «Оскуоланан «Кэскиллиин!» диэн акция ыытылла турар. Манна үөрэнээччилэрбит Н.Е. Мординов-Амма Аччыгыйа аатынан «Кэскил» оҕо бэчээтин кыһатын таһаарар сурунаалларыгар уонна хаһыатыгар кылааһынан сурутууну саҕалаатылар. Бүгүҥҥү күҥҥэ 1, 2, 5, 7, 10 кылаастар «Кэскил» хаһыакка, «Чуораанчык», «Юность Севера» сурунаалларга 6 ыйга суруттардылар. Оҕолор перемена кэмигэр оскуола библиотекатыгар кэлэн ааҕыахтара, билиилэрин хаҥатыахтара диэн эрэнэбит. Сурунааллары, хаһыаты оҕолор сөбүлээн ааҕаллар.
Хатыы агро хайысхалаах орто оскуолата малокомплектнай оскуолалар ахсааннарыгар киирэр. Холобур, быйыл оскуоланы бүтэрээччилэр сэттиэлэр, онтон маҥнайгы кылааска тоҕус оҕо үөрэнэр. Сорох кылаастар «Почта России» нөҥүө суруттардылар, онтон сорохтор альтернативнай подписканы туһаннылар, ол аата биһиги редакциябытыттан бэйэлэрэ кэлэн ылалларыгар сөбүлэстилэр. Онтон биһиги хас биирдии хаһыаты, сурунаалы манна мунньан, оҕолорго тиксэрэргэ бэлэммит.
Бу курдук оҕону ааҕыы эйгэтигэр көҕүлүүр үтүө хамсааһын өрөспүүбүлүкэбит бары оскуолаларыгар үтүө холобур буолуоҕа диэн эрэллээхпит.
keskil14.ru