Бу күннэргэ «Кэскил» оҕо бэчээтин кыһатын медиакииннэрин юнкордара СӨ Бырабыыталыстыбатын отчуотугар быһаччы кыттыыны ылан, сонуннары таһаараллар, ону тэҥэ нэһилиэк сытыы боппуруостарын туруорсаллар. Олунньу 18 күнүгэр СӨ ситэриилээх былааһын отчуота Ньурба улууһун Түмүк нэһилиэгэр буолан ааста. Сиһилии ол туһунан Маар орто оскуолатын «Юла» медиакиин бэлэмнээбит матырыйаалыгар билсиҥ.
Түмүк нэһилиэгэр «Алгыс» култуура дьиэтигэр СӨ Тыа хаһаайыстыбатын миниистирэ Артем Александрович Александров салайааччылаах бөлөх Саха Өрөспүүбүлүкэтин Бырабыыталыстыбата ааспыт 2024 сылга ыыппыт үлэтин түмүктэрин отчуоттаан олохтоохтору кытта көрүстэ.
Маҥнай өрөспүүбүлүкэбитигэр туох үлэ барбытын Артем Александрович сиһилии билиһиннэрдэ. Салгыы олохтоох нэһилиэнньэ сүрүн боппуруостарын ыйытан, ол тула кэпсэтиини ыыттылар.
Биһиги, Маар олохтоохторо, биир сүрүн боппуруоспут — саҥа оскуола тутуллуута буолар. Үөрэнээччилэр ааттарыттан оскуола бэрэсидьиэнэ, «Юла» медиакиин юнкора Авдей Неустроев тыын боппуруоһу көтөхтө:
— Мин оскуолаҕа бастакы кылааска үөрэнэ киирэрбэр саҥа оскуола тутуллуохтаах диэн истэр этим. Билигин мин оскуолабын бүтэрээри сылдьабын, хомойуох иһин, саҥа оскуола тутулла илик. Элбэх оҕолоох ыал оҕотобун, кыра быраатым саҥа оскуолаҕа киириэ диэн эрэллээхпин.
Нэһилиэккэ 1977 сыллаахха 150 миэстэлээх оскуола үлэҕэ киирэн дьон-сэргэ үөрүүтэ улахан этэ. Билигин оскуолабыт эргэрэн, аныгы ирдэбилгэ эппиэтээбэт. Саҥа оскуола тутулуннаҕына, эдэр ыччат тыа сиригэр олохсуйа да хааларыгар улахан хардыы буолуо этэ.
Маны таһынан олохтоохтор нэһилиэккэ 2009 с. үлэҕэ киирбит хочуолунай өрөмүөнүн, врачебнай амбулатория, 110-наах уот линиятын тутуутун туоһуластылар, үүт харчытын, сылгылары маркировкалааһын, медицина, үөрэхтээҺин эйгэтигэр каадырдарынан хааччылыы боппуруостарын туоһуластылар.
Үөрүүлээх түгэннэртэн, Маар орто оскуолатын саха тылыгар учуутала Александра Аркадьевна Иванова СӨ Үөрэҕин уонна наукатын министиэристибэтин Бочуотунай грамотатынан наҕараадаланна.
Отчуот кэннэ бары бииргэ кыттыһан, биир санаанан салайтаран үлэлээтэхпитинэ эрэ, нэһилиэкпитигэр саҥа оскуола тутуута саҕаланыаҕа, нэһилиэкпит сайдан иһиэҕэ диэн толкуйга кэллибит.
СӨ Тыа хаһаайыстыбатын миниистирэ Артем Александрович Александровтыын интервьюну видеоҕа көрүҥ:
Сайыына ТОБОНОВА, 11 кылаас үөрэнээччитэ.
Видео: Авдей НЕУСТРОЕВ, 9 кылаас үөрэнээччитэ.
Маар орто оскуолатын «Юла» медиакиинэ, Ньурба.
keskil14.ru