Спорт национальнай көрүҥнэригэр XXII төгүлүн ыытыллар «Манчаары оонньуулара-2025» Спартакиада Тааттаҕа от ыйын 7-12 күннэригэр ыытыллар. Онтон Спартакиада ымыылара (талисманнара) кимнээҕий?
Талисманнар ааптардара Таатта кыыһа Санаайа Доргуева, билигин Владивосток куоракка Уһук Илиҥҥи федеральнай университетка 4 кууруска үөрэнэр.

Талах Бэргэн. Булчут, бэйэтин кыанар, сымса. Таатта талаҕын курдук имигэс, муҥура суох сэниэлээх уолан. Кыратык ыһыллаҕаһын мэлдьи бииргэ сылдьар доҕоро Туллук өйдөтөр, санатар үгэстээх. Талах Бэргэн дьээбэлээх-хооболоох, доҕотторугар олус бэриниилээх. Уол көрүҥэ спортивнай, мэник, арбайбыт баттахтаах. Чээлэй күөх сахалыы стилизованнай спортивнай көстүүмнээх. Санныгар доҕоро Туллук олорсо сылдьар.
Кэрэ Кытыл. Таатта Эбэ сиэн кыыһа. Доҕотторо аҥардас Кэрэ диэн ааттыыллар. Нарын, сэмэй эрээри, туруоруммут сыалын ситиһэр. Сыыдам, мэһэйдэри ойон, сүүрэн холкутук туоруур быһый атахтаах кыыс. Көрүҥэ спортивнай, уһун уу суһуоҕа дьууппа курдук эргийэн кэлэр, сэттэ таастаах диадемалаах.


Тоттооной оҕусчаан. Олус сэмэй. Баппат күүһүн билинэн, толкуйдаан-толкуйдаан баран биирдэ сорунар. Ол эрээри мүччүргэннээх сырыыларыгар биир-биир мэһэйдэри туоруур, суолун тоҕо солуур. Модьу көрүҥнээх эрээри, мааны камзоллаах, илиитигэр мээнэ киһи кыайбат, эрчиллэр таастаах.
keskil14.ru