Биһиги Л.Н. Харитонов аатынан Маҕарас орто оскуолабыт 2005 сыллаахтан агро оскуола статуһун ылан үлэлиир. Сүөһү-сылгы ииттэн, оҕуруот олордон тыа сирин үлэтин баһылыырга кыһаллабыт.
Тохсунньу 26 күнүгэр Одунуга бэлиэ күн үүннэ. «Горнай улууһа» МО көҕүлээһининэн «Маҕарас агрооскуолата» тыа хаһаайстыбатын потребительскай кооператива, Л.Н. Харитонов аатынан Маҕарас орто оскуолата уонна «Агроэксперт» хааччахтаммыт эппиэтинэстээх тэрилтэ бырайыактарынан «Учебная мини-ферма» үөрүүлээх арыллыыта буолла. 10-13 төбөҕө мини-ферма арыллар бырайыага оҥоһуллубута.

Бу мини-ферма бырайыагын оҥорууга оскуолабыт 10,11 кылаас уолаттара кыттыспыттара. Ол курдук, 2023 сыллаахха оскуолабыт иһинэн бырайыак оҥоруу күрэҕэ аныгылыы тутуулаах хотон бырайыагын оҥорон көмүскээбиттэрэ. Күн бүгүн 200 кв.м иэннээх аныгылыы бырайыактаах хотон үлэҕэ киирдэ. Томскай уобаластан 13 айширскай боруода ынахтар кэлэн, 11 ньирэй этэҥҥэ төрөөтүлэр, 2 оҕус, 9 тыһы. «Горный Ас» СХППК тэрилтэ айшир ынахтар үүттэрин атыыга таһааран, үлэ бара турар.


Онтон биһиги оскуола оҕолоро айширскай ынахтары үөрэтиэхпит, араас НПК-ларга кыттыыны ылан дьоҥҥо-сэргэҕэ билиһиннэриэхпит.
Виола Замятина, «Одуну кыымнара» пресс-киин, Маҕарас орто оскуолата, Горнай.
keskil14.ru