Ахсынньы 20 күнүттэн тохсунньу ый 17 күнүгэр диэри Өксөкүлээх Өлөксөй аатынан Норуоттар доҕордоһууларын дьиэтигэр национальнай култуура галереятыгар «Симэх» норуот ускуустубатын уонна уус-уран оҥоһуктарын национальнай киинэ тэрийэн ыыппыт IV эрэгийиэннэр икки ардыларынааҕы «Бисер Севера» быыстапка киэҥ далааһыннаахтык ыытылынна. Манна өрөспүүбүлүкэ 24 улууһуттан уонна Арассыыйа 5 эрэгийиэниттэн барыта 119 маастар кыттыыны ыллылар.


Манна Эбээн-Бытантай улууһуттан Кустуур орто оскуолатын алын сүһүөх учуутала Түгэһиир эбээннэрин уран тарбахтааҕа Ольга Олеговна Попова ситиһиилээхтик кытынна. Ольга Олеговнаны бу туһунан сиһилии кэпсииригэр көрдөстүбүт.
— Тэрээһини Сахабыт сирин араас муннуктарыттан ыалдьыттар, Дьокуускай куорат олохтоохторо кэлэн көрбүттэрэ кэрэхсэбиллээх. Быыстапка чэрчитинэн араас көрүҥнэргэ, оҕуруонан тигиигэ маастар-кылаастар ыытылыннылар. Маны таһынан, IT Парк-ҕа «Точка роста» саалатыгар маастардар билиилэрин хаҥатар, үөрэтэр сыаллаах өбүгэлэрбит мындыр өйдөрүнэн, тарбахтарыгар талааннарынан уус-уран оҥоһуктары оҥорон, көлүөнэттэн-көлүөнэҕэ биэрэн норуот ис туругун, өйүн-санаатын, оһуорун-бичигин хаалларар, үйэтитэр туһуттан, традицияҕа олоҕурар сыаллаах-соруктаах «Орнаменты национальной одежды и утвари народов Севера, Сибири и Дальнего Востока» семинар-практикум сэҥээриини ылла. Манна учуонайдар, норуот маастардара араас тиэмэлэрдээх дакылааттарынан кытыннылар. Олус интэриэһинэй семинарга сылдьыбыппыттан астынным, маастар быһыытынан сайдаргар наһаа туһалаах элбэх саҥаны биллим-көрдүм. Магадан, Московскай уобаластан, Забайкалье уонна Хабаровскай кыраайтан, Саха сирин улуустарыттан кыттааччылар онлайн-сферум нөҥүө семинарга холбостулар.

Тохсунньу 17 күнүгэр быыстапка түмүгүн таһааран, кыайыылаахтары наҕараадалааһын буолбута. Биһиги улуустан икки маастар буолан кыттыыны ылбыппыт. Түгэһиир эбээннэрин төрүт оһуордарынан матыыптаах, «Этнические украшения народов Севера, Сибири и Дальнего Востока» оҕуруонан коллекциябынан кыттаммын 1 миэстэ буолан үөрдүм-көттүм. Сыралаах айар үлэм үтүө түмүктээх, ситиһии көтөллөөх буолбутуттан астынным. Быйыл иис кэрэ абылаҥар ылларан дьарыктаммытым үбүлүөйдээх 10 сыла буолар!
Уран тарбахтаах Саха сирин норуотун маастарыгар Ньургуйаана Колесоваҕа СӨ култуура миниистирэ А.И. Ноевтан «За вклад в развитие народного прикладного искусства Республики Саха (Якутия) и в связи с закрытием IV Межрегиональной выставки «Бисер Севера»» махтал суругу үөрүүлээх быһыыга-майгыга туттардылар.
Ахсынньы ыйга өрөспүүбүлүкэтээҕи хотугу аҕыйах ахсааннаах норуоттар «Дуннэдув» («Земле моей») быыстапкаҕа кыттаммын, «Сохранение традиций национального шитья» традиционнай сумка күрэҕэр анал номинацияҕа тиксибитим.
Маны тэҥэ, Өксөкүлээх Өлөксөй аатынан Норуоттар доҕордоһууларын дьиэтигэр национальнай култуура галереятыгар, «Союз мастеров КМНС Якутии» түмсүү мунньаҕар ыҥырыллан, (салайааччы А.Е. Куличкина) маастардар кандидатурабын туруораннар уопсай куоластааһыннарынан сэкэритээринэн талылынным. Бу түмсүү Хотугу аҕыйах ахсааннаах норуоттар маастардарын, улуустары, регионнары кытта араас быыстапкаларга, күрэхтэргэ, сийиэстэргэ сырытыннарар, арыаллыыр сыаллаах-соруктаах үлэлииллэр. Мунньахха 2024 сыл түмүгүн уонна 2025 сыл тэрээһиннэрин былааннарын туһунан уонна атын араас боппуруостары кэпсэтистибит. Улууһум маастардарыгар сыллааҕы былааны сырдатыам, кэпсиэм диэн баҕа санаалаахпын.
Түмүкпэр миэхэ күүс-көмө, сүбэ-ама буолар бар дьоммор, чугас дьоммор ийэбэр, аҕабар, бииргэ төрөөбүттэрбэр, кэргэммэр, аймахтарбар улахан махталбын тириэрдэбин, — диэн кэпсээтэ норуот маастара, биһиги талааннаах биир дойдулаахпыт Ольга Олеговна Попова.
Биһиги киниэхэ кэрэ эйгэни түстүүр, эбээн норуотун үгэстэрин тиэрдэргэ үлэлэһэр күндү учууталбытыгар инникитин өссө да үрдүктэн үрдүк ситиһиилэри баҕара хаалабыт.
Арина Старостина, Кустуур орто оскуолатын 11 кылааһын үөрэнээччитэ,
«Биракчаан» медиакиин.
keskil14.ru