Кулун тутар 23-26 күннэригэр СӨ Үрдүкү музыка оскуолатын кэнсиэр саалатыгар «Новые имена Якутии» диэн эдэр толорооччулар XXV үбүлүөйдээх өрөспүүбүлүкэтээҕи аһаҕас күрэстэрэ буолан ааста. Биһиэхэ бу аатырбыт күрэскэ кыттыыбыт айар сайдыыбытыгар олус суолталаах түгэн буолла. Н.Б. Семёнов–Куорсун салайааччылаах «Хатыҥ Сыһыы ымыылара» фольклорнай ансаамбылбыт күрэс бастакы туурун ситиһиилээхтик ааһан, иккис түһүмэххэ тахсыбыппыт.
Күрэс күннэригэр биһиги өрөспүүбүлүкэ араас муннуктарыттан кэлбит кыттааччылар бэлэмнэниилэрин таһыма олус үрдүгүн бэлиэтии көрдүбүт. Хас биирдии тахсыы саамай күүстээх болҕомтону, норуот музыкатын дириҥник өйдөөһүнү уонна хомуска дьоҕурдаахтык оонньооһуну көрдөрдө. Үрдүкү музыка оскуолатын сыанатыгар тахсыы биһиэхэ идэ өттүнэн дьиҥнээх тургутуу буолбутун бэлиэтиэм этэ.
Ансаамбылбыт түмүктээх үлэтин, салайааччыбыт өйөбүлүн уонна хас биирдии кыттааччы кыһаллыытын, оскуолабытын уонна коллективпытын дьоһуннаахтык көрдөрдүбүт.
Күрэс түмүгүнэн ансаамбылбыт III истиэпэннээх лауреат аатын ылла уонна «Норуот фольклора, хомус» номинацияҕа кыайыылаах таҕыста. Салайааччыбытыгар Н.Б. Семёнов–Куорсуҥҥа бэлэмнэниибитин иһин уонна күрэс тэрийээччилэригэр тэрээһини үрдүк таһымҥа ыыппыттарыгар барҕа махталбын тиэрдэбин.
Ансаамбыл бары кыттааччыларын ылбыт наҕараадаларынан эҕэрдэлиибин уонна саҥа айар ситиһиилэри баҕарабын!
Валя НИКОЛАЕВА,
К.Д. Уткин аатынан Марха орто оскуолатын 9 кылааһын үөрэнээччитэ.
keskil14.ru