Биһиги кылааһынан Горнай улууһугар баран кэллибит. Бэрдьигэстээххэ биир күн иһигэр үс мусуойу көрдүбүт. 50 киһи батар улахан автобуһунан айаннаабыппыт.
Бастакынан, Семен уонна Софрон Даниловтар ааттарынан Духуобунас киинигэр сылдьыбыппыт. Онно Августина Николаевна Филиппова «У Лукоморья» диэн коллекцията баар эбит. Остуоруйаҕа баар дьоруойдар таҥастара барыта оҕуруонан тиһиллибит.
Августина Николаевна айар талааннаах дьонун кытары ону барытын илиилэринэн тикпиттэр. Мин саамай өйдөөн хаалбыт түгэним — Александр Сергеевич Пушкин ойуулаах улахан паннота.
Иккис мусуойбут, Дьячковский Валерий Маисеевич-Сиэн Харах корнепластика коллекцията буолар. Манна араас мас силиһиттэн айылҕа бэйэтэ оҥорон таһаарбыт фигураларын Валерий Моисеевич ситэрэн биэрэр эбит. Кини тыаҕа тахсан оҥоһуктары көрдүүр уонна дьиэтигэр кэлэн инструменнарынан кыыллары, дьону өссө оонньуурдары оҥорор эбит. Холобур, хотон аттыттан кыталыкка майгынныыр маһы булан ылбыт уонна икки мүнүүтэ иһигэр ситэрэн кыталык буолан тахсыбыт. Ардыгар туттар матырыйаалын билэр-билбэт дьоно Валерий Моисеевичка анаан аҕалаллар эбит. Уопсайа 450-тэн тахса оҥоһугу оҥорбут. Мин бу быыстапканы олус сөбүлээтим, өссө баран көрүөхпүн баҕарабын.
Үсүһүнэн, Михаил Ефимович Тимофеев аатынан кыраайы үөрэтэр түмэлгэ тиийбиппит. Онно Горнай улууһун чулуу дьоннорун үөрэппиппит. А.Н. Осипов хартыыналара, Мохначевскайдар ыал сахалыы музыкальнай инструменнара, Горнай улууһугар баар кыыллар уонна да элбэх экспонаттары көрбүппүт. Саамай интэриэһиргээн көрбүт-истибит хоһум — спорт хоһо буолар. Манна Олимпиада кыттыылаахтара Герман уонна Александр Контоевтар, Кристина Тимофеева уонна да атын спортсменнар хаартыскалара тураллар. Герман Контоев Олимпиадаҕа кэппит борцовката, бэйджига манна баар эбит.
Ити курдук биир күн иһигэр элбэҕи биллибит-көрдүбүт. Бэрдьигэстээххэ барыгытын ыҥырабын.
Даниил Скороходкин, Дьокуускай куорат А.Г. уонна Н.К. Чирээйэптэр ааттарынан национальнай гимназия 4 «Б» кылааһын үөрэнээччитэ.
Кэскил14.ру