Ыам ыйын 16 күнүгэр Таатта улууһун оскуолаларын тыйаатырдарын икки ардыгар «Театр аптаах эйгэтэ – оҕолорго» диэн сонун фестиваль буолан ааста. Биһиги оскуолабыт «Ай Талаан» оҕо тыйаатырын оҕолоро аҕыс буолан салайааччыбыт Саина Иннокентьевна Рахлеевалыын кытынныбыт.
Фестиваль үс түһүмэхтээх ыытылынна. Бастаан дьиэтээҕи сорудаҕы көрдөрүү буолбута, эрдэ тыйаатырбыт сыллааҕы олоҕун көрдөрөр видеолары устан ыыппыппыт. Биһиги «Ай Талааммытыгар» барыта 18 оҕо сылдьар.
Сыл устата Николай Неустроевка аналлаах дьүһүйүү киэһэтин, «Бэйбэрикээн эмээхсин» музыкальнай спектакль, Кыайыы күнүгэр спектакль туруорбуппут, куонкурустары тэрийбиппит уонна кыттыбыппыт туһунан видеоҕа сырдаппыппыт.
Иккис түһүмэх «Бэйэни билиһиннэрии» этэ. Ырыа, үҥкүү доҕуһуоллаах театрализованнай билиһиннэрии буолбута. Үһүс түһүмэх салайааччыны кытта сыанаҕа тахсан хоһоон ааҕыыта этэ. Биһиги Ярославль куоракка 50-тан тахса сыл олорбут биир дойдулаахпыт, суруйааччы Иннокентий Давыдович Винокуров «Уолбалар диэн буолабыт» хоһоонун аахпыппыт.
Барыта улууспут алта оскуолатын хамаандата күрэхтэстэ. Биир эрэ кыайыылаах хамаанда бэлиэтэммитигэр Тааттатааҕы лицей 3 кылааһын оҕолоро кыайыылаах кубогынан наҕараадаламмыта. Атыттары барыбытын тылынан хайҕаабыттара.
Олус интэриэһинэй күн буолбута, оҕолор бэйэ-бэйэбитин кытта билистибит, элбэх саҥаны биллибит. Мин маннык тэрээһини биһирээтим.
Устя Лазарева, В.И. Ленин аатынан Уолба оскуолатын 7 кылааһын үөрэнээччитэ, Таатта.
Кэскил14.ру