Биһиги нэһилиэккэ муус устар 30 күнүттэн саҕалаан уонча күн «Тулуйхан» диэн оҕолору уонна улахан дьону ырыаҕа эрчийэр лааҕыр буолан ааста. «Тулуйхан» ырыаҕа оҕолору үөрэтэр лааҕыр аан бастаан биһиги оскуолабытыгар, ол саҕана муусука учуутала Томская Сардана Владимировна ыҥырыытынан, 2007 сыллаахха Светлана уонна Егор Неустроевтар кэлэннэр, элбэх оскуола оҕотун хабан үөрэппиттэрэ.
Быйыл эмиэ Сардана Владимировна кэпсэтиитинэн, Неустроевтар кыыстара Светлана Егоровна кэлэн, оҕолорго элбэх распевкалары, ырыалары, хамсаныылары үөрэттэ. Уопсайа 26 оҕо, учууталлар, «Алаһа» сынньалаҥ киинин ансаамбыллара дьарыктаннылар. 10 күннээх эрчиллии кэнниттэн, ыам ыйын 9 күнүгэр нэһилиэккэ 31 нүөмэрдээх отчуоттуур кэнсиэр көрдөрбүппүт. Манна биирдиилээн соло, кыра, улахан оҕолор, улахан дьон араас ырыалары толорон дьон биһирэбилин ыллылар.
Түмүккэ ырыаҕа эрчиллибиппитин иһин Светлана Егоровна туоһу суруктары туттарбыта. Киниэхэ махтанан, эҕэрдэлээн оскуола аатыттан махтал сурук, өйдөбүнньүк бэлэх, төрөппүттэр сибэкки дьөрбөтүн, бэлэх туттардылар.
Светлана Егоровна педагог-репетитор, дирижер, музыкальнай продюсер, хормейстер, элбэх кэнсиэртээх бырайыак автора, вокальнай ансаамбыллар салайааччылара.
— Ханнык үөрэххэ үөрэммиккитий?
— М.Н. Жирков аатынан Дьокуускайдааҕы музыкальнай училищеҕа хоровое дирижирование, Екатеринбург куоракка Ураллааҕы педагогическай университетка музыка учууталын, ХИФУ юрист идэтин бүтэрбитим.
— Хас сыллаахтан дьону ырыаҕа эрчийэҕит?
— 1997 сылтан оҕолору хорга үөрэппитим. «Тулуйхан» ырыа студиятын үс улууһунан биэс филиалы үлэлэтэбин. Өрөспүүбүлүкэтээҕи «Бабочкалаах уолаттар» ансаамбылларын, “Ырыа барахсан”, “Туой Хайа” бэстибээллэр куонкурстарын тэрийсибитим.
Сандаара БОРИСОВА, 9 кылааһын үөрэнээччитэ,
«Көмүс» бөрүө медиа-киин, Илбэҥэ, Бүлүү.
Кэскил14.ру