Ахсынньы 17 күнүгэр Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар «Профессионалы-2024» идэҕэ сатабыл чемпионата, «Технологии моды» хайысхаҕа муниципальнай түһүмэх буолан ааста.
Кыратык бу хамсааһын туһунан билиһиннэрдэххэ «Профессионалы» чемпионат бырайыага оскуола оҕолорун аныгы уонна кэлэр кэм идэлэригэр бүтүн аан дойдутааҕы таһымҥа бэлэмниир. Бу хамсааһыҥҥа хас биирдии баҕалаах оскуола оҕото кэлэр кэскил идэлэригэр профессионал дьонтон үөрэнэн, бэйэтин кыаҕын, дьоҕурун араас хайысхалаах идэҕэ уонна эйгэҕэ боруобаланарыгар бэлэмниир тэрээһин. Манна көхтөөхтүк кыттыбыт оҕо оскуолатын бүтэрэн баран, баҕарбыт идэтин дириҥник баһылыыр кыахтанар.
Онтон чемпионакка «Технологии моды» хайысхаҕа Таатта улууһун 4 оскуолатыттан, 7 кыттааччы күрэхтэстилэр, ол курдук:
А.И. Софронов аатынан бастакы нүөмэрдээх Ытык-Күөл орто оскуолатыттан — Уварова Евдокия.
А.Е. Мординов аатынан Тааттатааҕы лицей оскуолатыттан — Аржакова Виктория, Большакова Элеонора, Тимофеева Аэлита.
Г.Д. Бястинов — Бэс Дьарааһын аатынан Чымнаайы орто оскуолатыттан — Нестерова Василена.
Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугуттан — Васильева Ярослава, Никонова Милена. Уонна уопуттаах экспиэртэр: Поисеева Надежда Архиповна, Кириллина Анисия Владимировна, Большакова Күннэй Саввична, Антоева Раиса Дмитриевна бу үлэлэри сыаналаатылар.
Кыттааччылар 4 чаас иһигэр ох курдук оҥостон, бэйэлэрин дьоҕурдарын, сатабылларын көрдөрдүлэр.
Күрэх түмүгүнэн уопуттаах экспиэртэр күрэхтэһии бастыҥнарын быһаардылар:
1 миэстэ — Никонова Милена, Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһуга.
2 миэстэ — Аржакова Виктория, А.Е. Мординов аатынан Тааттатааҕы лицей оскуолата.
3 место — Большакова Элеонора, А.Е. Мординов аатынан Тааттатааҕы лицей үөрэнээччилэрэ буоллулар.
Онтон бу хайысхаҕа кыайбыт оҕо аны саас «Профессионалы-2024» өрөспүүбүлүкэтээҕи түһүмэҕэр баран кыттыаҕа. Кэлэн кыттыбыт ыалдьыттарбытыгар уонна тэрийээччилэргэ барҕа махталбытын тиэрдэбит.
Варианна Макарова, Таатта, Харбалаах.
keskil14.ru