Кыайыы 80 сылыгар уонна АЛСИБ историятыгар аналлаах икки күннээх Кыайыы волонтёрдарын экспедицията Өймөкөөҥҥө этэҥҥэ түмүктэннэ. Былаан быһыытынан тыа оскуолалара бары кыттыыны ылыахтаах этилэр да, кэккэ биричиинэлэринэн табыллыбата.
Бастакы күҥҥэ экспедиция Томтор оскуолатын мусуойуттан саҕаламмыта. Мусуой салайааччыта Л.П. Березкина мусуой уонна АЛСИБ туһунан кэпсээбитэ. Ол кэнниттэн биллиилээх краевед Р.Т. Дягилеваны кытта «Оймякон» пордугар барбыппыт. Кини порт уонна АЛСИБ устуоруйаларын билиһиннэрбитэ.
Томтор оскуолатыгар Кыайыы волонтёрдарын куратора Ярослав Карлович Винокуровы кытта көрсүһүү буолбута. Онтон 15:00 чааска Татаайап хайатыгар барбыппыт. Бадарааннаах, уулаах сирдэри этэҥҥэ туораан, хайаҕа тахсыбыппыт. Бырдах наһаа элбэх эбит. Радомир дронунан Ф.И. Биох пааматынньыгын көрдөөбүтэ да, барыта мас бөҕө үүнэн көстүбэтэҕэ. Урут өйдүүрбүтүнэн, Роза Тимофеевна, Екатерина Гаврильевна ыйыыларынан түөрт чаас көрдүү сатаан баран төннүбүппүт.
Иккис күммүтүгэр старшай лейтенант П.П. Горельцев П.П. “Аэрокобра” авариялаабыт сиригэр айаннаабыппыт (Үчүгэйтэн 7 км сир). Екатерина Гаврильевна сирдээн, бу сырыыга туох да эрэйэ суох сыалбытын ситистибит. Биһигини кытта Р.Т. Дягилева барса сырытта. Кини онно саҥа сылдьар эбит. “Миигин өссө да илдьэ бараарыҥ атын экспедицияларга”, диэн эппитэ уонна махтаммыта. Мусуойбутугар экспонат бөҕөтүн хомуйдубут. Оҕолор дьиҥнээх байыаннай сөмөлүөтү көрөннөр, интэриэһиргээтилэр аҕай.
Авария буолбут сиригэр Екатерина Гаврильевна Посельская П.П. Горельцев туһунан кэпсээбитин оҕолор интэриэһиргээн иһиттилэр. Ону тэҥэ Миша Сутаков, Сандаар Слепцов уонна мин трассаҕа өлбүт лётчиктар тустарынан кыратык билиһиннэрдибит.
Бырайыакпыт олоххо киирэригэр көмөлөспүт Екатерина Гаврильевнаҕа уонна Анна Гаврильевнаҕа, икки күн оҕолору салайсан илдьэ сылдьыбыт Матрёна Михайловнаҕа, кыттыыны ылбыт Айыына Валерьевнаҕа, суоппарбытыгар Николай Андреевичка экспедиция кыттыылаахтарын уонна төрөппүттэрин ааттарыттан барҕа махталы биллэрэбин.
Ону тэҥэ информатика учуутала Дьулустан Афанасьевичка махталбытын тиэрдэбит. Кини оҕолору дрону туттарга үөрэтэн, экспедициябытыгар саҥа сүүрээн киирдэ, сүрдээх туһаны аҕалла.
Альбина Еремеевна Алексеева,
Н.О. Кривошапкин аатынан Өймөкөөн орто оскуолатын түмэлин салайааччыта.
keskil14.ru