Үөрэтии-такайыы суолугар саҥа үктэммит учууталларга сыллата ыытыллар «Эдэр учуутал-2025» үгэскэ кубулуйбут күрэх олунньу 19 күнүгэр биһиэхэ, Хайахсыкка үрдүк таһымнаахтык буолан ааста. Уопсайа Чурапчы улууһун үрдүнэн 14 эдэр учуутал кэлэн бэйэлэрин билиилэрин, үөрэтэр ньымаларын көрдөрдүлэр. Бииртэн биир бастыҥ, чаҕылхай эдэр учууталлар бааллар.
Күрэх устата 4 холбоһук – алын кылаас учууталларын, естественнай, общественнай уонна гуманитарнай предметтэр методическай холбоһуктара биир ситим буолан үлэлээтилэр.
Күрэх алта түһүмэҕинэн ааста. Бастатан туран куйаар ситиминэн видео визитка уонна бэйэлэрин билиһиннэрии түһүмэҕэ буолбута. Ол кэнниттэн кыттааччылар оскуолабыт үөрэнээччилэригэр билбит үөрэтии ньымаларын, оҕолору кытта хайдах үлэлииллэрин көрдөрөр аһаҕас уруоктары ыыттылар. Оҕолору кытта кэпсэтии, санааны атастаһыы буолла. Салгыы кыттааччылар биир идэлээхтэригэр бэйэлэрэ үөрэтэр ньымаларын кэпсиир маастар-кылаастары ыттылар уонна түмүктүүр түһүмэххэ төгүрүк остуолга инники күөҥҥэ тиийбит кыттааччылар судьуйа ыйытыыларыгар бастыҥ, эппиэттээтилэр.
Биһиги оскуолабыт аатыттан кыттыыны ылбыт алын кылаас учуутала Милена Валентиновна Захарова санаатын маннык үллэһиннэ:
– Маннык курдук опыт ылыытыгар аналлаах тэрээһиҥҥэ кыттарым миэхэ бастакытын буолла. Ол иһин олуһун долгуйбутум, ону кытта интэриэһиргээбитим. Элбэх баҕайыны биллим, эдэр биир идэлээхтэрбиттэн элбэххэ үөрэнним, чугас дьонум өйөбүлүттэн олуһун дьоллоннум. Маннык курдук учууталларга үөрэтэргэ аналлаах тэрээһиннэр бааллара олус наадалаах. Эһиил өссө да кыттыам диэн эрэллээхпин.
Кыттааччылар анал номинациялары, оскуолаларын ааттарыттан сэмэй бэлэх тутан, дириҥ уопут иҥэринэн тарҕастылар.
Общественнай уонна гуманитарнай предметтэр хайысхатыгар кыайыылаахтарынан С.А. Новгородов аатынан Чурапчы орто оскуолатын география учуутала Мария Дмитриевна Пермякова уонна Төлөй орто оскуолатын омук тылын учуутала Валентина Васильевна Мигалкина ааттаннылар.
Естественнэй наука хайысхатыгар кыайыылаахтарынан П.М. Васильев аатынан Соловьев орто оскуолатын физкультура учуутала Илана Афанасьевна Никитина уонна профессор Г.П. Башарин аатынан Сылаҥ орто оскуолатын биология, химия учуутала Ангелина Дмитриевна Монастырева ааттаннылар.
Муҥуутуур кыайыылааҕынан Чурапчы улууһун «Эдэр учуутал-2025» күрэх кыайыылааҕынан И.Е. Федосеев-Доосо аатынан Дириҥ агрооскуолатын алын кылаас учуутала Ксения Семеновна Яковлева буолла.
Эдэр учууталлар күрэхтэрэ олус истиҥник барда. Тэрээһин кэмигэр тула күрэхтэһии буолбакка, доҕордоһуу, үөрэҕэрии уонна билии туһугар түмсүү тыына баара. Бэйэ-бэйэни өйөөһүн, бэйэ-бэйэни кытта кэпсэтии, саҥаны-сонуну билии – тэрээһин сүрүн ис хоһооно буолла.
Чурапчы улууһун үөрэҕин управлениетын кылаабынай специалиһа, Хайахсыт орто оскуолатын куратора Дмитрий Андреевич Илларионов бэлиэтээн эппитин курдук, бу тэрээһиҥҥэ кыайтарыы, хотторуу диэн суох, бары уопут ылан, итэҕэстэрин ситэрэн, билиилэрин чиҥэттилэр.
Вадим КОЛЕСОВ, XI кылаас,
А.П. Илларионов аатынан Хайахсыт орто оскуолата, Чурапчы