Билии күнүгэр Н.Е. Иванов аатынан Бөтүҥ орто агрооскуолатыгар ураты түгэн буолла. Ол курдук, тапталлаах оскуолабытыгар агротехнологическай кылаас аһылынна. Бу федеральнай «Кадры в АПК» бырайыак чэрчитинэн өрөспүүбүлүкэҕэ арыллар 9 агрокылаастан биирдэстэрэ буолар.
Үөрүүлээх тэрээһиҥҥэ улуус тыатын хаһаайыстыбатын управлениетын салайааччыта Ион Кононов, оскуола дириэктэрэ Алексей Никитин, нэһилиэк баһылыга Саргылана Борисова, өрөспүүбүлүкэтээҕи учууталлар идэлэрин үрдэтэр институт дириэктэрэ Юрий Шишигин, улуустааҕы үөрэх управлениетын салайааччытын солбуйааччы Акулина Иванова истиҥ эҕэрдэлэрин эттилэр. Аныгы ирдэбиллэргэ эппиэттиир тупсаҕай кылаас арыллыытын туоһулуур аалай лиэнтэни Ион Кононов, биология учуутала Ида Назарова уонна VII кылаас үөрэнээччитэ Ньургун Осипов үөрүүлээх быһыыга-майгыга быстылар.
Агрокылааска VII-VIII кылаас үөрэнээччилэрэ үөрэниэхтэрэ. Биология уруогар «Генетика и селекция растений» хайысханы дириҥэтэн үөрэтиэхтэрэ. Кылааска ноутбуктар, интерактивнай панель, экобокс уонна атын саҥа тэриллэр кэлбиттэр. Кэлин агролаборатория уонна «умная гидропоника» эбиллиэхтэрэ.
Үөрэнээччилэри СӨ тыатын хаһаайыстыбатын миниистирин э.т. Анна Стручкова күөх экран нөҥүө эҕэрдэлээтэ, ситиһиилээхтик үөрэниҥ диэн баҕа санаатын тиэрдибитин көрдүбүт-иһиттибит.
Бу саҥа аһыллыбыт кылааска «Быйаҥ» сайыҥҥы лааҕырга сайын устата оҕуруокка үлэлээбит кыргыттар VIII кылаас үөрэнээччилэрэ Күннэй Сдвижкова, Асель Борисова уонна Сайаана Данилова бэйэлэрин үөрүйэхтэрин кэпсээтилэр.
Онтон салгыы үөрүүлээх линейкабытыгар Норуоттар сомоҕолоһууларын сылыгар аналлаах, Билии күнүн арыйар Россия былааҕын бэтэрээн учууталларбыт, туйгун үөрэнээччилэр көтөхтүлэр. Үгүс эҕэрдэ, баҕа санаа этилиннэ. Тыа хаһаайыстыбатын управлениетын салайааччыта Ион Кононов оскуолаҕа эҕэрдэ суругун уонна уон киилэ ынах арыытын ылыыга сертификат туттарда.
Биһиги оскуолабытыгар түөрт эдэр учуутал үлэлии кэллилэр. Маҥнайгы кылааска 16 оҕо оскуола боруогун атыллаан киирэ. Кинилэр учууталлара Мария Иванова. Дойду үрдүнэн оҕо хамсааһынын түмсүүтэ биллэрбит акциятыгар төрүт үгэспитинэн кыттыһан, үөрэх дьыла саҕаламмыт туоһутун “Самолетик будущего” быйылгы үөрэх дьылын түмүктүүр XI кылаас үөрэнээччилэрэ маҥнайгы кылаас үөрэнээччилэригэр туттардылар. Көтөр аалларга оҕолор кырачааннарга баҕа санааларын суруйбуттар.
Түмүккэ, үөрэхпит тигинээн тиийэн кэлбитин биллэрэр чугдаарар чуорааны XI кылаас туйгун үөрэнээччитэ, улуустааҕы олимпиадалар, «Шаг в будущее» научнай-практическай кэмпириэнсийэ кыайыылааҕа Валерия Рязанская, Бүтүн Россиятааҕы, өрөспүүбүлүкэтээҕи, улуустааҕы «Шаг в будущее» научнай-практическай кэмпириэнсийэ кыайыылааҕа Андрей Тимофеев уонна маҥнайгы кылаас үөрэнээччилэрэ Алисия Яковлева, Эрсан Андреев лыҥкыначчы тыаһаттылар. Үөрэх-билии аартыгар үктэммит маҥнайгы кылаас үөрэнээччилэрэ бары чуорааны лыҥкынатан, олус астыннылар.
Билии күнүн чэрчитинэн күммүт иккис аҥарыгар Глобус аһыллыыта буолла. Бырайыак ааптардарынан биһиги выпускниктарбыт Аян Иванов, Ренат Семенов уонна үлэ учуутала Сандал Степанов буолаллар. Грант күөн күрэһигэр кыайан, бу бырайыак олоххо киирэр үөрүүлээх чааһа үүннэ. Эҕэрдэлэр кэнниттэн арт-объегы арыйар аалай лиэнтэни VI кылаас үөрэнээччилэрэ Андрей Артемьев, Эрсан Рязанскай уонна Сандаар Васильев кырыйдылар. Уолаттар «Эрчим» сайыҥҥы үлэ лааҕырыгар элбэх үлэни үлэлээбиттэрэ, глобуһу кырааскалаан, ситэрсэн көмөлөспүттэрэ. Онтон дойдубутугар Норуоттар сомоҕолоһууларын сылын бэлиэтээн туран, Глобуска араас өҥнөөх ленточкалары бары төгүрүччү туран, баайан түмүктээтилэр. Бу арт-объект улууска бастакынан биһиги оскуолабытыгар турда.
Бу кэннэ футболу сэҥээрээччилэр күөх хонуулаах былаһааккаҕа күрэхтэстилэр. Сэргэх күрэҕи Аҕа сэбиэтин салайааччыта Спартак Васильев, тустуу тренерэ Мичил Попов уонна физкультура учуутала Семен Ефимов тэрийэн ыыттылар. Кыттыбыт оҕолор бары бочуоттаах миэстэни ылан астыннылар, сэмэй бириистэри ылан дуоһуйдулар.
Виолетта Иванова, IX кылаас үөрэнээччитэ, «Сайдам» медиа-киин чилиэнэ,
Бөтүҥ, Амма.
Кэскил14.ру