Ыам ыйын 19 күнүгэр оскуолабытыгар үөрэх дьылын түмүктүүр «Дьиэ кэргэн – норуот тирэҕэ. Саха норуотун поэта Иван Мигалкин дьиэ кэргэнин холобуругар» диэн тиэмэҕэ «Дьоһуннааҕы кэпстии» дьарыктар кылаастар аайы ыытылыннылар.
Биһиэхэ «Дьоһуннааҕы кэпсэтиини» кылааспыт салайааччыта Наталья Матвеевна саха норуотун поэтын Иван Васильевич Мигалкин дьиэ кэргэнин туһунан, кинилэр оҕону иитиигэ ураты ньымаларын, ситиһиилэрин туһунан кэпсээтэ. Иван Мигалкин «Оҕо мичээрэ» хоһоонун ааҕан иһитиннэрдэ. Онтон филворд оонньууга дьиэ кэргэн, оҕо саас, доҕордоһуу о.д.а. тыллары таһаардыбыт.
– Бүгүн үөрэх дьылын түмүктүүр үөрүүлээх линейкабытын ыыттыбыт. Онтон кылааспытынан тарҕаһан, Н.Е. Мординов-Амма Аччыгыйа аатынан «Кэскил» оҕо бэчээтин кыһата бэлэмнээбит дьиэ кэргэн туһунан матырыйаалы туһанан «Дьоһуннааҕы кэпсэтии» дьарык буолла. Иван Мигалкин кынаттаах тылларын ис хоһоонун оҕолору кытта ырыттыбыт. «Бэрэски» хоһоон барыбытыгар олус чугас. Бэрэски астааһына дьиэ кэргэни түмэр күүстээх. Бэл, бу хоһоонтон бэрэски сыта кэллэ диэн оҕолор бэлиэтээтилэр. Дойдубут Президенэ В.В. Путин ыйааҕыгар олоҕуран, Ил Дархаммыт А.С.Николаев дьаһалынан элбэх оҕолоох ыалга өйөбүл, көмө оҥоһулларын туһунан оҕолорго иһитиннэрии киирбитин биһирээтим. Оҕолор демография өйдөбүлүн, суолтатын биллилэр. Түмүк хоһоону олус сөбүлээтим», – диэн кылааспыт салайааччыта, «Радуга» оҕо тэрилтэтин салайааччыта Наталья Матвеевна Степанова санаатын үллэһиннэ.
Биһиги бүгүҥҥү кэпсэтииттэн дьиэ кэргэҥҥэ оҕону үтүө сыһыаҥҥа, төрөөбүт дойдуга бэриниилээх, түмсүүлээх буоларга иитии дойдубут олоҕор, инники сайдыытыгар, олохпут туруктаах буоларыгар улахан суолталаах диэн өйдөөтүбүт.
Айыына Петрова, Александра Иванова, VIII кылаас,
«Эрчим» медиа киин, Дүллүкү, Үөһээ Бүлүү