Бөтүҥ нэһилиэгин олохтоохторо Улуу Кыайыы 80 сылын көрсө өрөспүүбүлүкэтээҕи «Бары бииргэ Кыайыыга» диэн девизтээх «Кыайыы Знамята» аахсыйаҕа көхтөөхтүк кытынныбыт.
Тохсунньу 14 күнүгэр Н.Е. Иванов аатынан Бөтүҥ орто агрооскуолатын спортсаалатыгар Кыайыы былааҕын дойдубут өрөгөй ырыаларынан көрүстүбүт. Тэрээһин үөрүүлээх чааһыгар эҕэрдэ тылларын Амма улууһун баһылыга Степан Кузьмин, улуус депутаттарын сэбиэтин бэрэссэдээтэлэ Владимир Колосов, Амма улууһун бэтэрээннэрин сэбиэтин салайааччыта Мария Захарова, нэһилиэкпит баһылыга Алексей Никитин, Бөтүҥ нэһилиэгин чулуу ыанньыксыта, IV истиэпэннээх уордьан кавалера, САССР тыатын хаһаайыстыбатын судаарыстыбаннай бириэмийэтин лауреата, СӨ тыатын хаһаайыстыбатын үтүөлээх үлэһитэ, Саха сирин, Амма улууһун уонна Бөтүҥ нэһилиэгин бочуоттаах олохтооҕо, Дьоруой Ийэ, тыа сирин Далбар Хотуна Аграфена Сутакова уонна оскуолабыт президенэ, «Эрэл» оҕо хамсааһынын чилиэнэ, VIII кылаас үөрэнээччитэ Айдын Иванов эттилэр.














Историяҕа суруллан-тиһиллэн хаалар, өйгө хатанар умнуллубат бэлиэ түгэҥҥэ оҕолуун-кырдьаҕастыын тоҕуоруһан көрдүбүт, эҕэрдэ ырыаны иһиттибит, патриотическай тыыны сүрэхпитигэр-быарбытыгар иҥэрдибит уонна сэдэх буолар хаартыскаҕа түстүбүт, видеоҕа уһулуннубут. Сэргэх тэрээһин түмүктүүр чааһыгар Кыайыы Знамятын былааҕын салгыы аттынааҕы Уус-Маайа улууһугар атаардыбыт.
Тэрээһиҥҥэ кэлбит ытык-мааны кырдьаҕастарбыт алын сүһүөх оҕолоругар кылаас чаастарыгар сылдьан, сэрии ыар сылларыгар оонньооботох оҕо саастара хайдах ааспытын туһунан кэпсээтилэр, оҕолор эҕэрдэлээн ырыа ыллаатылар, хоһоон аахтылар уонна хаартыскаҕа түстүлэр.
Виолетта Иванова, Юрьяна Гурьева,
«Платформа» медиакиин чилиэннэрэ, Бөтүҥ, Амма.
keskil14.ru