Ыам ыйын 19 күнэ — Пионерия күнэ биһиги Уолбабытыгар ураты суолталаах. Саха сиригэр бастакы пионерскай тэрилтэлэр баар буолууларын саҕана биир бастакынан, 1924 сыл олунньу 7 күнүгэр биһиэхэ тэриллибит буолан олус баай историялаах. Онон сылын аайы араас тэрээһиннэринэн бэлиэтэнэр.
Быйыл «Өксөкү сиэннэрэ» — алын кылаас үөрэнээччилэрэ — учууталларын кытта оскуола тэлгэһэтигэр, тапталлаах кургааммыт анныгар пионердыы сбор тэрийдилэр, станцияларынан оонньуу ыыттылар. Сэттэ араас сорудахтаах квест оонньууга кыттан оҕолор учууталларбытын кытта оонньоотубут, күрэхтэстибит. Бары буолан 4 хамаандаҕа арахсан “Өксөкү сиэннэрэ” ыытар тректэринэн күрэхтэстибит: «Басхан-Өксөкү сиэнэ», «Киэҥ билиилээх Өксөкү сиэнэ», «Уран уус — Өксөкү сиэнэ», «Бэйэтин баҕатынан көмөлөһөр — Өксөкү сиэнэ», «Эрчим — Өксөкү сиэнэ», «Айылҕаны харыстыыр — Өксөкү сиэнэ», «Историяны харыстыыр — Өксөкү сиэнэ».
Салама баайыытыгар, кубик хомуйуутугар, билиини бэрэбиэркэлиир ыйытыыларга хоруйдааһыҥҥа, хамаанданан үлэлээһиҥҥэ, кэрэ сирдэри, саха иһитин билиигэ, хаһыат оҥоруутугар күрэхтэһэн, наһаа элбэҕи, саҥаны биллибит. Түмүгэр бары волонтер буолан оскуолабыт территориятыгар баар бөхтөрү хомуйууга эмиэ күрэхтэстибит.
«Костер», «Ленинцы», «Катюша» хамаандалар анал ааты ылан үөрдүлэр уонна кыайыылааҕынан «Пионеры» хамаанда таҕыста. Барыбытыгар уруккуну санатар хаһыакка суулаах кэмпиэт уонна таас иһиттээх лимонад бэлэх биэрдилэр. Урукку дьиҥнээх пионердар ахтыы оҥорбуттара, андаҕардарын эппиттэрэ, ырыаларын ыллаабыттара. Билигин да умнубакка өйдүү сылдьаллар эбит диэн соһуйдубут.
Бу курдук тапталлаах кургааммыт анныгар сонун күн ааста.
Маайа Боппосова,
В.И. Ленин аатынан Уолба орто оскуолатын 7 кылааһын үөрэнээччитэ, Таатта.
Кэскил14.ру