Бүгүн, ыам ыйын 22 күнүгэр, Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар самаан сайыны көрсөр үөрүүлээх тэрээһин буолла. Бу тэрээһин өбүгэ үгэһин тилиннэрбит кэнсиэпсийэ тэриллибитэ 35 сылыгар ананна.
Учууталбыт Валентина Семеновна Кривошапкина ыйытык-харда кэпсэтиинэн үтүө үгэс диэн тугу этэрбитин санатта. Оччотооҕу национальнай кэнсиэпсийэ киириитин Таатталар үөрэ көрсүбүттэрин, араас хайысхалаах үлэ бөҕөнү тэрийбиттэрин билиһиннэрдэ. Кырдьык, нэдиэлэни быһа турбут хаартысканан кэпсиир быыстапканы көрөн, оччотооҕуга ыытыллыбыт тэрээһиннэри сөҕө-махтайа көрдүбүт.
Кэнники ааптарыскай бырагыраама буолан, өрөспүүбүлүкэҕэ тарҕаммыт «Норуот үтүө үгэстэрин тилиннэриигэ ыйдарынан үлэлэр» аан бастаан биһиги оскуолабытыгар ыытыллыбытын истэн, киэн тутуннубут. Юнескоттан, өрөспүүбүлүкэ араас улуустарыттан кэлэн, биһиги оскуолабыт уопутун үллэстэн барбыттар эбит.
Бүгүҥҥү тэрээһин иккис чааһынан кэнсиэпсийэ сайдыытыгар кылааттарын киллэрбит учууталларбытын В.С. Кривошапкинаны, В.П. Трофимованы наҕараадалааһын буолла.
Салгыы өрөспүүбүлүкэтээҕи «Даадар ааҕыыларыгар» ситиһиилээхтик кыттыбыт оҕолор Добун суруктары туттулар. Онтон күөх сайыны уруйдаан, оһуохайдаатыбыт.
Ити курдук, самаан сайыны айхаллыы көрүстүбүт.
Таисия Андреева, 9 кылаас үөрэнээччитэ, Харбалаах.
Кэскил14.ру