Улуу Кыайыы өрөгөйдөөх күнүн көрсө Г.Г. Софрогов аатынан Өлөөкө-Күөл оскуолатыгар араас тэрээһиннэр буоллулар. Ол курдук, «Кыайыы түннүктэрэ» аахсыйанан кылаастар бары түннүктэрин киэргэттилэр. Сэрии кэмин оҕолоругар, бэтэрээннэрбитигэр, хаар таһыытын, канааба хаһыытын субуотунньугар 4-11 кылаастар, учууталлар сырыттылар
Ыам ыйын 8 күнүгэр стройунан хаамыы күрэҕэ ыытылынна. Манна «Туллукчаана» уһуйаан бэлэмнэнии уонна улахан бөлөҕүн иитиллээччилэрэ кэлэн кытыннылар. Кылаастар бары байыаннай таҥас тиктэн, ырыа бэлэмнэнэн, хамандыыр салалтатынан хаамтылар. Бөлөхтөр аайы бастыҥнары эр дьон дьүүллүүр сүбэтэ быһаарда. Кыайыылаахтар бары добун суруктары, минньигэс бэлэхтэри туттулар.
Салгыы байыаннай эстафетаҕа икки хамаандаҕа арахсан 5-11 кылаастар күрэхтэстилэр. Автомат ыһан, хомуйан, салгын саатынан сыал ытан, противагаазтаах сүүрэн, наһыылкаҕа киһилээх сүүрэн оҕолор бэркэ илин-кэлин түһүстүлэр. Күрэхтэһии үһүс түһүмэ5э урукку оонньуу — былаах былдьаһыыта буолла. Манна сүбэлээх, албастаах, толкуйдаах, сымса хамаанда кыайыахтааҕа. Оҕолор манна да бэркэ астына оонньоотулар.
Ыам ыйын 9 күнүгэр «Өлбөт үйэлээх полк» халыҥ кэккэтигэр нэһилиэк олохтоохторо, оскуола оҕолоро, учууталлар хаамтыбыт. Сэлэлии хааман АБДь-га сырдык тыыннарын толук уурбут саллааттарбыт сквердэригэр өйдөбүнньүк чүмэчилэри уматан, кинилэр өлбөөдүйбэт мөссүөннэригэр хаартыскаҕа түһэн, ахтан-санаан аастыбыт.
Салгыы «Өлбөт үйэлээх полк» Кыайыы скверигэр бырааһынньыктааҕы миитиҥҥэ тиийдэ. Онно эҕэрдэлэр этилиннилэр, өйдөбүнньүк бэлэхтэр, наҕараадалар туттарылыннылар. Ылбаҕай ырыа, хомоҕой хоһоон иһиттибит, эҕэрдэ үҥкүүлэри көрдүбүт. Уоттаах Аҕа дойду улуу сэриитигэр кыттыбыт биир дойдулаахтарбытыгар «Чуумпуруу мүнүүтэтин», «Өйдөбүнньүк чүмэчитин» анаатыбыт.
Бырааһынньыкка кэлбит сэрии кэмин оҕолорун, кырдьаҕас бэтэрээннэрбитин кытта өйдөбүнньүк хаартыскаҕа түстүбүт.
И. Ноговицына Орто Халыма, Өлөөкө-Күөл б.
Кэскил14.ру