Биһиги нэһилиэкпитигэр буолбут биир олус үчүгэй тэрээһин туһунан кэпсиэхпин баҕарабын. Афанасий Петрович Илларионов аатынан Хайахсыт орто оскуолатын «Эрэл» оҕо тэрилтэтин оҕолоро Улуу Кыайыы күнүн көрсө дьоһун бэлэҕи оҥордулар – нэһилиэкпит олохтоохторугар түөлбэлэринэн «Агитбригада» эҕэрдэ кэнсиэри көрдөрдүлэр. Олус да сэргэх этэ!
Биһиги оҕолорбут үс сиринэн кэрийдилэр: «Таргыйах» түөлбэтигэр — Албан аат түһүлгэтигэр, «Чараҥ», «Ураһалаах «түөлбэлэргэ. Манна тиийэн хоһооннорун аахтылар, ырыаларын ыллаан, үҥкүүлээн дьону олус үөртүлэр. Бэйэбит оҕолорбут бу курдук талааннаахтарын көрөн киһи сөхпөккө ааспат.
Хайахсыппыт олохтоохторо бу тэрээһини бэрт солун диэн олус астыннылар. Көрөөччүлэрбит бары астынан-дуоһуйан, сэргэхсийэн, үчүгэй санаалаах тарҕастылар. Кинилэр үөрэллэрин, ытыс таһыналларын көрөн бэйэбит да олус үөрдүбүт.
«Эрэл» оҕо тэрилтэтин оҕолоругар махтал! Инникитин даҕаны туохтан да толлубакка, биир сомоҕо буолан, биир күүс буолан үүнэ-сайда туруҥ диэн баҕарабын.
Вика БОРИСОВА, Х кылаас,
А.П. Илларионов аатынан Хайахсыт орто оскуолата, Чурапчы