Кыргыһыы хонуутугар үйэлэргэ охтубут, сураҕа суох сүппүт, кыайыы кынаттанан кэлбит хорсун хоодуот сэрии бэтэрээннэригэр, Улуу Кыайыыны уһансыбыт биһиги ытык дьоммутугар, тыылга Кыайыы туһугар күннэри-түүннэри үлэлээбит тыыл бэтэрээннэригэр, уоттаах сэрии содулуттан охсууну ылбыт сэрии сылын оҕолоругар махтанабыт.
Кинилэр биһиги кэлэр кэскилбитин түстэһэн, дьоллоох олоҕу тутуспуттара. Сүгүрүйүөҕүҥ кинилэр албан ааттарыгар! Сэрии ыар тыына хас биирдии ыалы хаарыйбыта, сүрэххэ оспот баас буолан хаалбыта. Ийэ дойдуларын көмүскүү саа-саадах тутан, эдэркээн дьон, ыал аҕалара төрөөбүт дойдуларыттан аттаммыттара, сайыһа, ытаһа-соҥоһо хаалбыттара кинилэр күн-күбэй ийэлэрэ, таптыыр кэргэттэрэ, көмүс чыычаахтара, сорохтор төннүбэттии барбыттара…
Хомойуох иһин сэрии содулуттан охсууну ылан, сыл ахсын ытык кырдьаҕастарбыт көҕүрээн иһэллэр, умнумуоҕуҥ кинилэр кыайыылаах суолларын, олорон ааспыт дьоммутун кэриэстиэҕиҥ! Кинилэр үтүө холобурдарынан ыччаппытын иитиэҕиҥ!
Бар дьоҥҥут, оҕолоргут,сиэннэргит, чугас дьоҥҥут тапталларыгар бигэнэн, уһуннук олороргутугар баҕарабыт. Өрүү ыраас халлаан, эйэлээх олох аргыс буоллун, хас ыал ахсын үөрүү үтүмэнэ, дьол-соргу тосхойдун!
Кэскил14.ру