Алтынньы 16 күнүгэр Аҕалар күннэрин чэрчитинэн, сылын ахсын буолар «Лиссиэй кубога» футбол күрэҕин тоҕоостоох кэмҥэ ыыттыбыт. Спорт саалатыгар дьүккүөрдээх киирсиилэри көрдүбүт, күрэхтэһээччилэр кыайыыга дьулуурдара күүстээҕин, ыалдьааччылар бэйэлэрин хамаандаларыгар эрэллэрэ эҥкилэ суоҕун туоһулаатыбыт.
Турнир түмүгэ маннык буолла: 1 миэстэҕэ аҕалар хамаандалара таҕыста! Биһиги аҕаларбыт олоххо, спортка биһиэхэ холобур буолалларын бигэргэттилэр! 2 миэстэ учууталларбыт хамаандатыгар тигистэ! Спорт кэрэ түгэннэрин, эр санаа бастыҥын кинилэр көрдөрдүлэр! 3 миэстэни үрдүкү кылаас уолаттара ыллылар! Инникигэ эрэллэрбит бэртээхэй оонньууну көрдөрөн боруонса мэдээли ылыахтарын ыллылар. Орто сүһүөх кылааһын уолаттарын хамаандата «Кыайыыга дьулуурун иһин» анал бириис ылла. Кыттааччыларга, ыалдьааччыларга Уруй-айхал буолуохтун! Өрүү көхтөөхтүк, иллээхтик спорт олоҕун үрдүктүк тутуоҕун!
Алтынньы 17 күнүгэр Ийэ күнүгэр лиссиэй оҕолоро эрдэттэн бэлэмнэммиттэрэ: илиилэринэн уруһуйдаан, бэлэх оҥорон, хоһоон-ырыа үөрэтэн, сибэкки дьөрбөтүн атыылаһан күндү дьоннорун эҕэрдэлээтилэр.
Онтон 6б уонна 9б кылаастарын үөрэнээччилэрэ ийэлэригэр ураты бэлэх оҥорорго сананнылар. Быйыл лиссиэйгэ саҥа тэриллибит «Хаартыскаҕа түһэрэ үөрэнэбит» эбии дьарыкка сылдьар оҕолор көмөлөрүнэн ийэлэрин фотосессияҕа ыҥырдылар. 6б кылаас үөрэнээччилэрэ ийэлэригэр ылбаҕай ырыалаах, араас үҥкүүлээх, көрдөөх сыанкалаах кэнсиэр көрдөрдүлэр. Онтон 9б кылаас кыргыттара ийэлэрин, эбэлэрин кэрэ сэбэрэлэрин тупсаран, сырдатан, маанылаан киэргэттилэр. Ол кэннэ хаартыскаҕа түһүү буолла. Оҕолор күндү киһилэрин нарыннык кууһан, уйадыйан хаартыскаҕа түстүлэр. Кинилэр истиҥ сыһыаннарын эбии дьарыкка сөбүлээн сылдьар 7 кылаас үөрэнээччилэрэ Лия Слепцова уонна Марсель Дедюкин сүппэттии, умнуллубаттыы хаартыскаҕа хатаатылар. Ийэлэр, оҕолор сонун тэрээһини олус сэргээтилэр, сөбүлээтилэр, ураты бэлэҕи, махталы тэрийэн-салайан оҥорбут кылаас салайааччыларыгар Анна Саввичнаҕа, Юлия Семёновнаҕа, ВУД салайааччытыгар Александра Спартаковнаҕа уонна эдэр фотографтарга махтаннылар.
Алтынньы 10 күнүгэр лиссиэйбитигэр быыбар күнэ буолан ааста.
Түөрт 10 кылаас үөрэнээччилэрэ хандьытаакка турдулар, бэйэлэрин тус санааларын, саҥа сүүрээни киллэрэр былааннарын сырдаттылар. Ол курдук бастыҥ үөрэнээччи Кириллина Аайа, ураты көрүүлээх, элбэх ситиһиилээх Солдатов Өркөн, быйыл саҥа кэлбит чаҕылхай үөрэнээччи Шепелев Маркел, ааспыт үөрэх сылыгар бэрэсидьиэнинэн ситиһиилээхтик үлэлээбит Петров Владислав. Тыҥааһыннаах быыбар түмүгүнэн лиссиэйбит Бастакылар Сэбиэттэрин бэрэссэдээтэлинэн Петров Владислав дьон эрэлин ылан иккиһин хаттаан талылынна! Владислав холобур буолар үөрэнээччи, быйылгы үөрэх сылыгар элбэҕи киллэриэҕэ, ситиһиэҕэ диэн эрэнэбит. Лиссиэйбит сайдыыта барыбыт кэскилбит буолар!
«АЛиК медиа-киин» Амма лиссиэйэ